Odd-even scheme takok nguogo: Kejriwal

New Delhi, Janyary 15 (Agencies): Delhi nung gari senzüba timtem aser mopung menenba nokdangtsü atema benokba odd-even scheme ya takok ngua kadagi, ta Hokolbar nü Delhi Chief Minister Arvind Kejriwal-i ashi.

Delhi nung odd registration number garitem aser even number registration garitem anogo balala nung melentepa senzüba January 1 nü tenzüka liasü, aser January 15 nü iba tetendangba tembangtsü ghonda pezü shi dang lia Kejriwal-i, odd-even mapatong ajanga mopung menenba ajema kümogo aser tongtibangsüa linük yimtiba nung gari junga mesenzütetba tebilemtsü koktetogo, ta ashi.

“Odd-even mapatong nung aikati onok nungita yariogo,”  ta Aam Aadmi Party tongti leniri osangbenertem dang ashi.

Odd-even mapatong takok angutsü atema Delhi High Court aser Supreme Court nungi obendangertemi gari sentepa amshiba atema Kejriwal-i parnok nem tenüngsang balaka agütsü.

Chief minister-isa Delhi nüburtem dang Honibar anogo nungi tenzüka ano maneni odd-even mapatong benshitsü mepishiogo.

“Nenoki iba ya (maneni) inyaktettsü. Iba ya asenok temang anema alitsü, asen chirtem anema alitsü aser yimti nüburtem anema alitsü atema lir,” ta pai ashi.

“Nisungtemi, parnoki gari tangar den sentepa amshitsü tenzükogo aser lenmang nung mapang mintoki senzüba lemsateptsü tenzükogo. Delhi lenmangtem sadema kümer ama reprangteter,” ta paisa shisem.