Kerry o Lavrov nati taruba hopta ajuruteptsü renemer

Washington, January 15 (Agencies): US Secretary of State, John Kerry aser Russia Foreign Minister, Sergei Lavrov natiSwitzerland kübok Zurich yimti nung taruba hopta ajurutepa Syria aser Ukraine na den sentakba onük benoka senden amentsü sentong renemogo.

“Ozü lenir Kerry aser Russia Foreign Minister, Lavrov nati telephone ajanga jembiba sülen tenati taruba Bodbar nüZurich yimti nung ajurutepa senden amentsü renemogo,” ta US State Department ketdangsertemi tanü metetdaktsü.

“US Tir, Barack Obama aser ozü Tir, Vladimir Putin nati tan Bodbar nü telephone ajanga Syria aser Ukraine na den sentakba ken o benokba jembiba sülen tenati Kerry o Lavrov nati tsüngdong ajuruteptsü tetuyuba agütsüogo,” ta Russia foreign ministry-ia osang jangjashitsü.

Syria’er mangatettep ken o bentettsütsü nükjidong nung alima tashi abenba linük lenirtemi tan January ita 25 nüGeneva nung senden amentsü ayonga lir.

Ajisüaka, Saudi Arabia-i tongti Shiite putir ka tepseta merenshiba ajanga par linük o Iran na tsüngda tesendaktep tang mejungi akümba yong Geneva sendenji takok ngua mementettsüsa tang tensa ajurua lir.