France mitkartem CAR linük nungi anitettsü: Hollande

Paris, January 15 (Agencies): Central African Republic (CAR) linüki election agia par Tir shimba sülenbo France mitkartem CAR nungi anitetadoktsü renemba osang ka France Tir, Francois Hollande-i yashi Brehostibar nü metetdaktsüogo.

“CAR tensa azüoka lendongtsüdong matalokdaktsütsü nükjidong nung France mitkartem CAR nung yuja lir. Ajisüaka, CAR-i par Tir tasen shimba sülenbo France mitkartem CAR nungi anitetadoktsü,” ta Hollande-i metetdaktsü.

France-i tesüiba mapang par yimli kübok densemba CAR linük nung par mitkar züngsem 900 shi tang yuja lir.

CAR-i mezüngbuba Tir election shilem yaküm December ita 30 nü agiba sülen tesüiba CAR Ato Kilonser 2 – Anicet Georges Dologuele o Faustin Archange Touadera nati temaba jenjang angu saka tenati Tir menden abentsüsa jenjangbo monguteti lir.

Muslim nisungtemi tentetba Seleka sorkar anemertemi Christianpur timba aliba linük tashi tashiyim agi agitsü merangba sülen CAR nung 2013 küm nungi tenzüka tensa mejungi aküm.

CAR tensa mejungi akümba yong tensaji azüoka lendongtsüdong matalokdaktsütsü nükjidong nung Franc-i par mitkar züngsem 2000 shi CAR-i yoka saka tanübo mitkar züngsem timba anitetadokogo.