Delhi nung ‘World Culture Festival’ akatsü

Delhi, January 15 (Agencies):  Ministry of Culture, Ministry of Tourism, Sangeet Natak Akademi, Lalit Kala Akademi aser National School of Drama nungeri New Delhi nung March ita ayongtsü aliba ‘World Cultural Festival’ nung linük 155 nungi arua adentsü imlar.

World Culture Festival ya anogo asemnü amungba sentong ka alitsü aser iba ya ‘cultural diversity & Art of Living’ küm 35 ajungba mung lir. ‘Art of Living’ ya Sri Sri Ravi Shankar-i ngutetba inyakyim ka lir aser iba benjung ya tan mezüngsüa March 11 nungi 13, 2016 nü tashi amungtsü sentong lir.

World Culture Festival ajanga sobaliba, linük aser tamangba yimsü balala nungi nüburtem kibong ka ama adenshia yimjung osang proktsü.

Iba benjungmung ajanga nisung meyirjang aika anidena yimjung tashi sayutsü nükjidong lir. Kasa sentong ajanga sobaliba, yimtenren aser business tsütsü lenirtem külemi lungjmer yimjung aser tepela tsütsü rangloker taküm nung temelenshi bener arutsü maongka agütsütsü, ta Sri Sri Ravi Shankar-i sangdong ka ajanga metetdaktsü.

Iba benjungmung atema sabangji acre tenet alitsü aser iba sabang nung tetushi tejaoker den alima balala nungi kentener, tsüngsanger aser ano sobaliba dak sentakba ajanga shilem agütsü.

Iba den külemi anogo asemprong nung Sri Sri Ravi Shankar-i ‘Peace Meditation’ sentong anitsü.