US tsür kati Twitter anema ken o benokogo

New York, January 15 (Agencies): Florida, US nung alir tetsür kati micro-blogging site Twitter ajanga Islamic State (IS) züngsem züiner ta tai tonglokja court nung ken o benokogo.

wired.com ajanga ashiba agi, yaküm November ita, Amman, Jordan nung kiralongrartemi kinüngbo tepseter alila, Tamara Fields-i Twitter anema ken o benok.

Twitter mali asübo küm ishika tsüngda nung nisung ajaki tsübutepba IS telok ya yamai kara merenloktsüba asü aser aji tamakoktsü süla, ta lai court dangi züluba shidi nungji zülua lir.

“Twitter-i metetsümonga IS olulutem prokshidaktsür aser iba social media ajanga parnok züngsem shimba menokdanger,” ta lai ashi.

Aji oda süaka Twitter-i parnok anema benokba ken o aitsüogo.

“Iba ken o ya tamendakdak mali, ajisüaka lar kibong nung atalokba angashia onoka temulung mepelateter,” ta Twitter nung otongdar kati sangdong ka ajanga metetdaktsü.

“Alima nüburtemi tsübuba den saku onokia item kiralongrartemi internet ajanga mapa tamajung inyakbatem tsübur. Parnok telok renlokba aser inyakyim nung twitter teka mali aser social network tanga ama onokia mapa tamajung nokdanger,” ta otongdari ashi.

Aji oda süaka Fields-i, court dang Twitter-i ‘Anti-Terrorism Act’ anema inyakogo ta sangdonga, ta ashi.

“Iba ken o nung Fields meten nungbo online ajanga sorkar temi kiralongra yimya mesüka jembisembatem dena Twitter tai akümtsü, ta wired.com-i ashi.

Tesüiba ita Twitter-i kiralongra olulu kar entoktsü memulungba ajanga Turkey sorkari parnok dang sen dollar 50,000 senchi chia liasü.

Yimya aser jembishinü tamajung azüoktsü mechi nung Twitter-i tesüiba ita parnok indang ozüng khen reprangshiogo aser ibaji ajanga kiralongratsü osang online ajanga prokshiba dena nokdangtsü meranger.

“Kati ka amokmerenba aser aitsütepba nungi kümzükba ajanga nüburtemi Twitter nung pei bilemba sadoka lemsatepteter,” ta trust & safety at Twitter nung director, Megan Cristina-i Twitter ajanga lemsatep.

“Twitter ajanga kati ka anemtepba aser amokmerenba Twitter-i joko memelatsü. Teti ama onoki nübur ajak dang pei bilemba aser teshinüba tangar meyirutsüsa lemsateptsü ajungshir,” ta laisa ashi.

Küm aika Twitter-i item mapa tamajung nokdangtsü asoshi mera aika agiogo aser o tamajung nokdangtsü asoshia ‘tools’ balala enoktsüa liasü.