Mizoram kaketshirtemi Delhi semdang

Aizawl, January 15 (Agencies) : North East state tem nungi tanurtem linük tangalen alirtem den sendakteptsü atema Assam Rifles-i tawa tu Mizoram kübok yimtsüng nung aliba tanurtem asoshi ‘national integration tour’ ka ayongzüka agi.

Mizoram nungi aoba tanurtem rongnung timbaka tan mezüng atema Delhi semdangba liasü aser parnoki Union Minister of State for Home Kiren Rijiju den ajurutepa sensaksemba atema kanga pelaba ashi.

“Northeast aser Jammu & Kashmir amala tesemtem nungi aser ano BSF, CRPF nungeria Bharat Darshan nükjidong nung kaketshir aser lanurtem tesem balala semdanga anir senzüba angudang ni kanga pelar. Iba ya linük longjemshiba mapa ka lir aser Assam Rifles-i mapang talangka tejaklen nungi iba mapa tajung inyaka arur” ta Rijiju-i osangbener dang ashi.

Linük nung yimjung aliba state ji Mizoram ka lir aser iba state nung infrastructure aser connectivity jenjang yanglushiba ajanga tourism mapa takok ngua inyaktettsü, ta Rijiju-isa shisem.