Dimapur nung yi case 1144 aser SP süngjang 5000 apu

Dimapur, January 15 (TYO) : January 8, 2016 nü Dimapur Police-i truck gari (NL-07-A -6164) nung yi case 1144 tashi bena lia apu, ta Addl. Dy. Commissioner of Police/PRO Dimapur-i sangdong ka nung metetdaktsü.

Iba dak sendakba nung gari driver Bishnupur, Manipur nungi Jamaruddin’er jabaso Rijayuddin apu aser tatalokba bushisüngdangtsü atema Diphupar Police Station nung ken o ka benokogo

Ano January 9, 2016 nü Kolkata nungi Dimapur-i ozüng alema shibelenba mozü aika bener arutsü osang tejangja ka angazükba sülen Dimapur Police-i mita atadang Spasmo Proxivon süngjang 5000 apu, ta sangdong nungsa shia lir.

Mozütemji Md. Ali’er jabaso Jamaluddin ket nung bena liasü aser iba dak sendakba nung SBN Police Station nung ken o ka benokogo.

January 12, 2016 nü Dimapur Police Toluvi Village, Dimapur nung Katovi Sema’er jabaso Tovi Sema apu.

Iba nisung yagi New Market area nung Pre-activated SIM Card balala ayokba atema aija apu.

Ozüng ajanga pre-activated SIM Card ayoktsü memelar aser nisungtemi item mesükba SIM Cards alia mamshitsü nenshia metetdaktsü, ta Dimapur Police sangdong nungsa shia lir.