Sharif-i Iran o Saudi Arabia na semdangtsü sentong renemer

Islamabad, January 16 (Agencies): Pakistan Ato Kilonser, Nawaz Sharif-i taruba Hombar nü Iran aser Saudi Arabia na semdangtsü sentong renemba osang ka par ketdangsertemi tanü Honibar nü metetdaktsüogo.
Tang tesendaktep mejungi aliba Iran aser Saudi nati tanaben sendaktepshia tensa tajungba kümdaktsütsü ajungshitsü nükjidong nung Sharif-i par linük anaji semdangtsü sentong renemba osang angazükogo.
Pakistan’er ketdangsertemi Iran aser Saudi lenirtem den ajurutepa par tangatetbaren melenshitsü ajungshia aruba sülen Sharif-i tan Iran o Saudi na semdangtsü sentong renemer lir.
Saudi-i tongti Shiite putir ka tan January ita tetenzüklen tepseta merenshiba ajanga Shiite nisung timba aliba linük, Iran kanga jashidaktsü.
Ano, Saudi-i Shiite putir tepseta merenshiba kepzüktsü nükjidong nung Iran nung nübur telok kati Tehran nung tentetba Saudi embassy amakba sülen Saudi aser Iran na tsüngda tesendaktep mejungi aküm.
Par linük ana tsüngda tesendaktep mejungi akümba ajanga tang Middle East ajunga nung tensa mejungi akümtsü tenzüka lir.
“Ozü lenir, Sharif-i tamasa Iran semdanga par Tir, Hassan Rouhani den ajuruteptsü aser kasa anogo nung Saudi semdanga par chuba, King Salman bin Abdul Aziz dena ajuruteptsü sentong renemogo,” ta Sharif’er ketdangsertemi osang jangjashitsü.
Sharif-i tan Iran o Saudi na semdangdang par Foreign Affairs Advisor, Sartaj Aziz aser Foreign Affairs nung Special Assistant, Tariq Fatemi na anisemtsü sentong renema lir.