Alimai Iran anema benokba tenokdangbaren agientsü renemshir

Vienna, January 16 (Agencies): Iran den yaküm 2015 küm nuclear tezüngzüktep agiba sülen alima tashi abenba linüktemi Iran anema benokba tenokdangba sentongtem agientsü terenemshibaren Austria kübok Vienna yimti nung agiba osang jangjaogo.
Tehran anema benokba tenokdangba sentongtem agientsü maparen nung shilem agitsü asoshi US Secretary of State, John Kerry-ia Vienna tanü, Honibar nü tonga aoba osanga jangjaogo.
Kerry-i tanü Vienna tonga aoba sülen pa jakdang Vienna tonga alisang, Iran Foreign Minister, Javad Zarif den ajurutepa jurila senden mena liasü.
United Nations (UN) kübok tentetba International Atomic Energy Agency (IAEA)-i Iran’er nuclear mapatong den sentakba osang tatembangsüa tanü benokba sülen UN, United States (US) aser European Union (EU) nungeri Iran anema benokba atenokdangba sentongtem agientsü alizüng yua lir.
“Tanü  ya Iran linük asoshi tongtipang anogo ka lir kechiyong alima tashi abenba linüktemi ozü linük anema benokba tenokdangba sentongtem tanü agientsü,” ta Zarif-ia metetdaktsüogo.
Zarif-i Kerry den ajurutepba jakdang EU’er High Representative, Federica Mogherini dena ajurutepa par Iran anema benokba tenokdangba sentongtem agientsü onük benoka jembiba osang angazükogo.
Yaküm tezüngzüktep agiba ama, Iran-i asangsang nung inyak asü meinyak iba osang tejangja IAEA-i benoktsü renema lir.
Par linük anema benokba tenokdangba sentongtem agientsü melena Iran-i par nuclear mapatong anentsü tezüngzüktep ka Iran aser alima tashi abenba linüktemi yaküm July ita agia lir.