Kiralongrartemi Burkina Faso nung lendong atalokdaktsü; 23 shi tepset

Burkina Faso yimtiba, Ouagadougou nung Splendid Hotel aser gari ishika mi agi rongsar aliba noksa ka yangi angur. Islamist kiralongrartemi yasüng, Hokolbar aonung nungi tenzüka Splendid Hotel nung lendong tesashi ka atalokdakja ishiba agi nisung 23 tepsetba osang jangjaogo. (Ouagadougou, January 16)

Ouagadougou, January 16 (Agencies): Islamist kiralongrartemi Burkina Faso yimtiba, Ouagadougou nung lendong tesashi ka atalokdaktsüba osang ka Burkina Faso Security Minister, Simon Compaore-i tanü Honibar nü metetdaktsüogo.
“Islamist kiralongrartemi yasüng, Hokolbar aonung nungi tenzüka Ouagadougou yimti nung lendong tesashi ka atalokdaktsü saka ozü mitkartemi tan amaker ajunga tepsetogo,” ta pai ashi.
Burkina Faso mitkartemi Splendid Hotel amaker nisung 3 injang agi kasetba sülen parnoki tashiyim agi pua ayur nisung 126 tashi kümzüka anitetba osang jangjaogo.
Splendid Hotel nungi kümzüka aniteter rong nung nisung 30 shi yirua aliba osanga jangjaogo.
“Mitkartemisa anasa tentetba hotel tanga ka telung nung atsüka alir amaker nisung 4 buba injang agi kaseta tan amakba lendongji tembangtsü,” ta ashiba den külemi, tan amaker rong nung nisung 2 bo tetsür aliba osang bushitetogo ta Compaore-i metetdaktsü.
Tan lendongji par teloki atalokdaktsü ta shia, al Qaeda in the Islamic Maghred (AQIM) teloki tan lendong atalokdaktsüba atema tenüng agia metetdaktsüogo.
“West raliwalir aser France mitkar züngsemtemi kanga  sapuba Splendid Hotel amakertemi linük 18 nungi bendanger nisung 23 tashi tepsetba osanga jangjaogo,” ta pai osang jangjashitsü.
“Tan lendong nung nisung asüba aser yiruba atema sasa bilemer. Iba amala lendong atalokdaktsürtem ya lapi nisungtem lir,” ta yaküm 2015 küm November ita election nung takok ngua, taoba December ita Tir menden benoksang, Tir Roch Marc Christian Kabore-ia kanga jashia metetdaktsüogo.