Barack Obama-i Buhari White-House-i jaok

Washington, July 20 (Agencies): US Tir Barack Obama-i Hombar nü Nigeria Tir tasenba, White-House-i jaoka liasü aser iba mapang Obama-i tan mezüng democratic kübok aliba Nigeria linük den amalitepa yariteptsü, ta ashi.

Tan hopta Kenya aser Ethiopia na nung Africa nunger semdanga jajatsü aliba sentong nung iba continent nung züngsem timtiba aliba linük, Nigeria iba tarensen nung meinoksemba asoshi Obama inyakyim aija liasü.

Muhammadu Buhari Oval Office-i jaokba ajanga US Tir-i, Africa nung rongsenkettsüng tsütsü temaba jenjang nung aliba linük o US na tsüngda tangatettep tajung ka renloktsü teimla lir.

Tan mezüngsa election nung takok angur party ya Boko Haram telungpur den rarateptsü asoshi kanga shisa kaa inyakyimtem inyaktsüla.

2009 küm nungi Islamic state-i Nigeria anüdoklentip tsütsü amenoktsü merangba telungpur den raratsü atema, Nigeria-i US dang nungi teyari jenti nüngdaktsü.

Tang tashi nung Boko Haram telok yagi nisüng 15,000 taküm lalutsüogo aser million 1.5 tesem balala len prokshidaktsüogo.

Tang kidanger linük Cameroon aser Chad nung taküm bendanga agüja bomb apokertemi lendong agütsüba tensa ka nung Buhari White-House-i aruba ya, iba lendong indang ken o jembitsü atema aruba mesüka lir.

Ochi asoshi inyakertemi ashiba agibo linük nung lendong atalokbaji Boko Haram o Nigeria army naprongla dak keta lir.

US-i tanga linüktem dang raradang amshiba oset mayoktsü lemtetba ajanga nüji anema inyaker amai ka kümdaktsür.

Yaküm Obama lenisüba nung US-i ‘Cobra attack helicopters’ Nigeria dang mayoktsü lemteta ayu, koba ajanga linük ana tsüngda tesendaktep tera mokonga aküm.

Taküm May ita nung takok angusang Buhari-i army den yariteptsü mulunga aliba metetdaktsüogo. Pa ya taoba mapang nung army general ka ama liasü aser Nigeria nung military yimsüser ka ama liasü. Tan ita tetenzüklen Buhari-i linük military temaba jenjang nung alirtem ajak anendaktsüogo.

Nigeria nung Boko Haram anema raratsü asoshi Obama-i US sepai meyoktsüa akok.