Muslim nunger peladaktsüba mapatong anentsüla: VHP

Bengaluru, January 17 (Agencies): Tanü Hindu tentet VHP-i yimtenren party tem dang, Muslim nunger peladaktsütsü atema inyakba anentsüla, iba ya maneni inyaka arur aser iba ya ajanga linük yirutsür, ta ashi.
Parnokisa, linük nung Hindu nunger nütsüng dang nungibo Muslim nunger nütsüng kanga tekaraba ainer, ta ashi.
Yimtenren party temi Mulim nunger peladaktsütsü atema inyakba mapatong anentsüla ta shia Vishwa Hindu Parishad (VHP) Joint General Secretary, Surendra Kumar Jain-i, iba ya maneni inyaka arur aser iba ya ajanga linük yirutsür. Peladaktsüba mojingji kodanga melung mesüdaktsütettsü, ta ashi.
Bengaluru nung VHP-i ayonga anogo ananü Bajrang Dal Akhila Bharatha Baitak sentong tembangba sülen osangbenertem den jembidang Jain-i, Supreme Court-ia Uniform population policy atema jembiogo, ta ashi.
“Muslim nunger nütsüng TFR (Total Fertility Rate) ji anogoshi ainer; tangbo Hindu nunger kanga ajema akumer, nütsüng (Hindu nütsüng) shilem 80 den ishiba kümogo,” ta VHP leniri ashi.
Madrasas nunger nokdangtsü sorkar nem takhangba agüja pai, “Pakistan-i Madrasas nokdanger, France, Germany aser Russia-ia nokdangogo. Iba ya inyakba ajanga Muslim anema rara ayonger masü, iba ya jihad anema lir,” ta ashi.
Lanurtemi kiralongrar telok, ISIS aser Muslim Moulvis nung adentsü merangba aser kiralongrar den tesentaktep aliba atema apuba dak sentakba nung Jain-i, Madrasas kaketshir karbo raraba oset amshitsü traning agiogo, aser iba nung ya lendong keta lir,” ta ashi.
Paisa, taoba Tir asür, Abdul Kalam nunger ama Muslim lokti nunga linük meimertem lir, iba ya Muslim nunger ajunga nem tai tongloktsüba ka masü, saka par lokti nungi telok kar indang jembir, ta ashi.
Bajrang Dal convenor, Rajesh Pandey-ia, nütsüng liro memedemi ainba ya lendong lir aser iba ajanga India-i amokmeren ajurutsü, ta ashi.
“Sorkari tamangba lokti ajak atema ‘common population policy’ latettsüla, iba ya ajanga Bangladesh aser Myanmar na nungi ozüng alema bendangertem linük telungi aitba tebilemtsü koktettsü,” ta Pandey-isa ashi.