Kochi Smart City taruba ita semzüktsü

Dubai/Kochi, January 17 (Agencies): Kerala nung atakteta yutsü mapang dang nungi talangba agia renemba Kochi Smart City taruba ita semzüktsü, ta Deobarnü Dubai nung iba project atema director tem senden ka akadang lemtetogo.
State IT nung iba senden nung adentsü asoshi anir aosang, Kerala IT & Industries Minister, P.K. Kunhalikutty-i, anogo tejangjaji taruba hopta lemtettsü aser iba mapang UAE nungi arutsü pur tenünga metetdaktsütsü.
Mezüngbuba phase dak sendakba ki semzüktsü aliba kiji square feet lakh 6.5 tulu lir aser iba ki ya company tasen 25-i agitsü shiogo, ta pai ashi.
Iba ki semzükba den külemi tanabuba phase yanglutsüba lunga azüngtsü aser iba kiji square feet lakh 47 asütsü.
Iba ki semzükba sentong acha ayangertemi ki semzükdang United Arab Emirates, Tatong Tir aser Ato Kilonser Sheikh Mohammed Bin Rashid Al Maktoum naprong jaoktsü inyaktepdar.
Iba IT project ya 2004 küm Chief minister Oommen Chandy aliba mapang Kochi nung ali acres 246 agia tenzüktsü sentong liasü saka metenzükteti arur taküm 2014 küm ang mezüngbuba phase tenzük.