PM Modi-i Gangtok aser Kokrajhar semdangtsü

Gangtok/Guwahati, January 17 (Agencies): Prime Minister Modi-i January 18, 2016 nü Gangtok semdangtsü aser idakji ‘Sikkim Organic Festival’ lapoktsütsü.
January 18 nü Modi-i Ridge Park nung organic horticulture aser January 19 nü Saramsa nung organic agri produce tesemtem semdangtsü.
PM Modi-i Saramsa semdangba mapang naring agi yangluba ‘Ganesha’ aser somomo agi yangluba ‘Sleeping Buddha’ reprangtsü, ta Sikkim MLA tem – PD Rai aser Hissey Lachungpa nati tanü osangbenertem dang ashi.
Ano, January 19, 2016 nü Prime Minister Narendra Modi-i Kokrajhar semdangi arutsü sentong lir aser iba atema Bodoland People’s Front (BPF)-i kanga yongya atar, kechiyong parnoki iba mapang Modi-i küm 5 shia Rs 1,000 crore senotsü teyari agütsütsü imlar.
Kokrajhar kübok Bodofa Nagar nung Modi-i BPF-i ayongzükba lokti senden ka nung o jembitsü.
Ajisüaka, ano külen All Koch-Rajbongshi Students’ Union (AKRSU)-i January 18 nungi tenzüka ghonda 48 Kamatapur bandh alitsü ayongzükogo.
Lok Sabha elections matongdang BJP-i parnok dang nangzükba ama mapa meinyakba atema AKRSU-i iba lungkak aitba sentong alitsü ayongzük. AKRSU yagi Assam aser West Bengal nungi Kamatapur ta ser state balaka tentettsü atema takhangba agütsür.
BPF-i Prime Minister Modi nem tezüluba nung parnok taginübatem agütsüba nung central schemes ajak atema state madeni parnok nem indangindanga senotsü agütsütsü indang shia lir.
Parnokisa, state nungi autonomous council dangi home department belentsü aser Karbi Anglong district nung Bodo nunger ajak ST (hills) list nung züngsemtsü atema Modi dang shiogo.
BPF-i parnok pusema nungitba Muslim nunger aser tang tesentaktep yangluba BJP tsüngda tiyongtsü nung putepa linür.
Osang angazükba agi, BPF president aser Bodoland Territorial Council (BTC) tanishisang Hagrama Mohilary-i parnok yariba Muslim nunger den ajuruteptsü aser idangji BTC nung terenlok bener arutsü atema dang parnoki BJP den tesentaktep yanglur ta osang sangoktsütsü.
BTC kübok assembly menden 12 lir aser item menden tangar nem magütsüi takok angubaji BPF atema kanga tongtipang. Ano BJP-i sorkar akümtsü atema alizüng yua aliba nung item menden 12 ajanga teyari tulu angutsü. Ajisüaka, BPF-i assembly menden kar BJP nem agütsütsü mulungtsü asü masü ta terata ka nung lir.
February 10, 2016 nü Bodoland Day nung Union human resource development minister Smriti Irani-i Kokrajhar nung tongti tesemdanger ama shilem agitsü sentong lir.