Railways-i diesel aser electric naprong agi jajatetba train yanglutsü

New Delhi, January 17 (Agencies): Indian Railways-i diesel agi jajaba train tem nung memenui electric agi jajatetsüsa engine talila ka enoksema yanglutsü.
“Onoki engine ana keta aliba train yanglutsü aser iba train ya diesel aser electric naprong agi jajatettsü,” ta Railway Ministry sangdong ka ajanga ashi.
Railways-i engine ana aketba mezüngbuba train pongu, Diesel Locomotive Works, Varanasi nung yanglutsü aser item train tem nung horse power (HP) 4500 keta yanglutsü.
Iba mesükba train ya US aser Africa nungbo amshidar, ajisüaka India nungbo tan mezüngsüa yanglutsü, ta ketdangsertemi ashi.
Linük nung tang jajaba train noklang nung shilem 52 bo diesel agi jajar. Diesel agi jajaba train tem electric agi jajatettsü atema electric engine sa melenoka liasü ajisüaka iba mapa nung mapang kanga agir.
“Tan diesel aser electric engine naprong keta yangluba train nung engine talila kecha enoksemtsü menüngdaktsü kechiba süra yangluzükli nungi diesel aser electric naprong agi jajatettsü,” ta pai ashi.
Iba train ka yangluba nung sen crore 18 endoktsü ta asadangtetogo. Tang 4500 HP keta aliba diesel engine kaji sen crore 13 shi alang lir.
Iba train yanglutsü asoshi Research Design & Standard Design (RDSO) den tebilemba lemsatepogo.
“RDSO-i agizükba sülen DLW-i item train pongu yanglu tenzüktsü. Item train tem ya electrified routes aliba train lenmangtem nung mezüng tendangtsü,” ta ketdangsertemi ashi.
Engine anana keta yangluba train temji tang diesel engine keta aliba train tem dang taretba asütsü aser tajemtiba agi gondha nung kilometre 135 kara otettsü.
Electric agi jajatsü asoshi train kilem alema tur mesanga aliba electrified route nung train kilem nung mesenloka aliba ‘pantograph’ ajanga tangshidang tashi angur.