2015 küm Mkg district kübok arrtsülen tensa junga liasü : DC

Dimapur, January 18 (TYO) : 2015 küm Mokokchung district kübok Assam den arrtsüa aliba tesemtem nung tensa-mapang tajungba liasü, ta Mokokchung Deputy Commissioner & Vice Chairman DPDB, Sushil Kumar Patel-i ashi.

Mokokchung aser Assam nung alirtem tsüngda amalitep lia inyaksangshiba den Mokokchung o Sivasagar aser Jorhat district administration tem tsüngda mapang shia ajurutepa sendentem aliba ajanga tensa tajungba aküm, ta Sushil Kumar-isa ashi.

January 16, 2016 nü DPDB Mokokchung senden alidang Mokokchung DC-i iba osang metetdaktsü aser paisa Border Peace coordination Committee (Assam-Nagaland)-i arrtsülen alritem asoshi shilem tajung agiba atema tenüngsang agütsü.

Senden nungsa Sushi Kumar-i 2015 küm Mokokchung district nung mapa balala inyakba osang den nisung asemi national awards ngua district atema tenüng tajung bener arutsüba osang lemsatep.

Mokokchung DC aser DPDB vice chairman-isa February 10, 2016 nü National De-worming Day amungtsü indang osang metetdaktsü.

Iba anogo nung school aser angangwadi centre ajak nung arishi küm 1-19 tsüngda aliba tanur ajak nem de-worming mozü agütsütsü. Iba sentong nung District Welfare Office aser District Education office den Health & Family Welfare department temi yariteptsü paisa ayongzük.

Senden nungsa Republic Day benjungmung dak sendakba onüktem lemsatep aser Fusion Sporting Club Chuchuyimlang, Confederation of Entrepreneur & Skill Development Dilong Ward, Mokokchung nunger registration atema kulikakettem bangdakpur dangi abentsü telemtetba agi.