Asen lima kümzükdi

Alemlibo asen lima kümzüktsüba mapaji bendanger tsükchir ket nungi kümzüktsüba dang liasü saka tanübo asen lima raksatsür tsükchirji bendanger masü asenokang kümogo. Aji oda, asenoki asen lima memeim tenük amur chiyongtsü aser rongsen bushidang asenok samatsüsa asenoki inyaker. Asenoki inyakba item teraksatsüba mapatem rongnung ayong nung miim mozü amshia ango apuba, arem shiruru mapayui samatsüba, arem mapayui lepdokba aser lendong ataloktsü ta mebilemdangi ali telong nung aliba mijang (coal/nakmati) atubatem ya asütsü. Item mapatem jagi tzü mopong menendaktsüba dang masü saka yim ajak samatsüsa lendong ataloktsü ana nung lir. Atangji, asenoki asen lima raksatsüsa inyakba mapatem karbo asenokia merajem aser mangatet inyaka alitsüa akok, anungji lendong tulu matalokdang asenok o asenok na shisalemsatepa tangatetba agütsütsü nüngdaker. Tatishitsü agi, ayong nung ango entsü dena samatsü ta merajemi nisung kari ayong nung ango aika aputsü dang bilema mozü amshia alitsü akok, anungji iba ama nisung nem tangatetba agütsütsübaji kanga nüngdaker. Iba amaji tanü tesem aika nung ali telong nung aliba mijang atur, saka mijangji bushia ali telong ajak tudanga aoba agi tenem anenzüka alutsü ta mebilemi mijang dang ngurbo ta bilema tupet tua oa alitsü akok. Ibaji dang masü saka mijang dak miim keta lir, anungji ayong anasa mijang atuba agi ayong nung aliba taküm ajak samatsü ta mebilemi inyaka alitsüa akok. Iba amaji asenoki asen agitsü rongsen bushidang asenok sülen asen chirnurtem lia aotsüba nüngdaktem amadoker. Tanü asenoki asen achitsü chiyongtsü aser asen agitsü rongsen bushidang asen lima raksabaji asensasa asen suseta asütsü inyakba den kasa lir. Item mapatem rongnung teraksa aser lendong tulutiba ataloktsübaji mijang atuba mapa ya asütsü. Atangji, asen lima nung mijang atu tenzüker mapang talangkabo masü saka mijang atuba tesemtemji asenoki reprangdangra joko item tesemtem nungjibo aia mia mangutsü aser iba asasa aliba ayongtem nung taküm shiruru kecha mangutsü. Ano, lendong kaji asenok tenem nung yim küma lir aser tenemtsünglen tenemji tudanga telonglen mijang bushiyonga talangkati air. Iba liji menoknok anokdang mesüra menoknok manokyonga kenübo atemzüka alutsü aser idangji yimji meküpzüka alutsü. Tanü asen lima nung asenoki rongsen dang bilema ali telong agi tema küma atudang, item lendongji asüng ataloktsü ama yimdangi arua shisabolua bilemtsü nüngdaker. Atangji, ali telong aser tema nung aliba rongsen ajakji Tsüngremi asenok nem moatsüba rongsentem asütsü, anungji agiteta amshitsüla. Ajisüaka, rongsen bushidang asenokang lendongi aitsüsa asenoki inyakra, ibajibo kanga shisa maka mapa asütsü. Tanü asenok alima nung aliba ya asen tsüraburtemi asenok nem wazüka yutsüba lir. Aji oda, asenokia asen chirnurtem asoshi tarutsü lima tajungba ka yanglutsütsübaji kanga tongtibang asütsü. Iba tangatetba nung asenoki tanü kechi mapa inyakdir inyakaka, asen lirbo asüng asen chirnurtembo melitettsüsa meinyaktsüla. Asenoki ayong nung mozü amshiba ajanga tarutsü nung asen chirnurtem achitsübo kecha malitsüsa inyakra, asen chirnurtemi asenok atakatemtsü. Iba kasaji tanü asenok takar kümnüdang ali telong agi tema kümtsür yangji aia memeitsüsa aser yim küma aliba tenem kolakbo atemzüka alutsüsa asenoki inyakra asenoki repranga lia asen yim aser nübortem samatsü. Aji oda, kangabo memenudang asenoki item lendong aketba maparentem indang shisalemsatepa inyakra, asenok ajak samatsüba lendong tulu nungi asenok kümzüktsü. Tangar sen bushirtembo sen ngura ojang ta ser ali telong agi tema kümtsür yutsür aotsü, saka asenok asoshibo aji timtem lendong tulu ataloktsüba anogo tetenzüker asütsü. Alima nung nisungtem amtsük mesüra sen kija agi taküm alitsü makoktsü saka Tsüngremi agütsüba shisatsü agi pei aliba lima, yimtsüng, arem aser ayongtem wazüka aser kümzüka ayu nung dang, tanü alirtem taküm tajung lir külenang anosa asenok chirnurtem aser asenok chirnur-chirnurtem lipet lia aotsü.