Bodo nungeri Modi dang nungi tuluka imlar

Guwahati, January 18 (Agencies): Prime Minister Narendra Modi-i Assam semdangtsü lia, Bodo nunger telok asemi statehood onük atema ola adokogo aser parnoki mapang talangka nungi takhangba agüja aliba asoshi asüng tashi nungbo Centre-i telangzüba agütsütsü imlar.
All Bodo Students Union (ABSU), National Democratic Front of Bodoland-Progressive (NDFB-P) aser Peoples Joint Action Committee for Bodoland Movement (PJACBM) nungeri Bodoland state balaka tentettsü atema takhangba agütsü.
“Küm aika Bodo nungeri state balaka tenteta aotsü atema takhangba agüja arur. Bodo nunger nüjiso rara nung nisung 70,000 den timba taküm samaogo. Linük Temzüng nung Arrla 2 aser 5 kübok onoki state balaka tenteta aotsü takhangba agütsür” ta Hombarnü ABSU president Promod Boro-i osangbener dang ashi.
“Taoba mapang Uttarakhand, Jharkhand aser Chhattisgarh amala state tasentem tentetba onoki nguogo. Congress sorkar alidang Telangana tentet, ajisüaka Bodo nunger state tenteta aotsü atema mapa kecha meinyaktsü” ta Promod-isa ashi.
Ano, NDFB-P general secretary Gobinda Basumatary-ia ashiba agi, Bodo nungeri Prime Minister arutsü atema kanga yongya atar.
“2014 Lok Sabha elections atema BJP election manifesto nung Bodoland state ka tentettsü indang densema liasü, saka Centre nung parnoki sorkar yimsü asütsü tashi nguaka, tang tashi kecha meinyaktsü” ta Basumatary-isa ashi.
PJACBM convener Jebraram Moshahary-ia ashiba agi, Modi-i parnoki state balaka tentettsü takhangba agütsüba mulunga agizüktsü imlar.