Karbonn-i Karbonn Quattro L50 nung ‘Kandy’ enoktsü

New Delhi, January 19 (Agencies): Nüburtemi kanga sapua amshiba Karbonn Mobiles-i, parnok meyong 4G amshitetba Karbonn Quattro L50 phone nung ‘user interface (UI) Kandy’ enoktsü aser ibaji ajanga tamshirtemi 4G koma amshinür yamaji amshitettsü, ta Mongolbar nü sangdongogo.
Karbonn indang UI Kandy ya 4G amshi zübatsü, mapang talangka amshitettsü aser tangalen nungi timtem kecha mongui Quattro L50 HD amshitsü atema adok, ta company sangdong ka ajanga metetdaktsü.
Kandy ajanga temoyong agi ken dang tuloktsü nung phone nung asen nüngdakba tarensen adokdaktsütsü akoker.
Tamshirtemi pei dangi phone nung aruba osang aser mela mela lapokba tabs-tem pei aginüba ama tarensena yanglua yutettsü.
Quattro indang Kandy UI ajanga phone tereprangtsü dena kenyongi balaka küma melenshitettsü aser tamshitsüa tajungba kümdaktsür.
Iba den külemi, UI Kandy ajanga tamshirtemi pei-i amshiba data ajak kanga junga azüokteter.
Sen 7,990 alang, Quattro L50 phone nung ‘12.7cm HD IPS full lamination screen’ keta lir aser 1.3GHz Quad core processor & 2GB RAM den 16 GB ROM enokja lir.
Quattro L50 ajanga internet kanga kara amshiteter aser iba phone nung 2600mAhz battery enoka lir.
Phone tesülen 13MP AF camera aser tejaklen 5MP FF camera mesenlokja lir.