Eagles telok tentetsang arishi küm 67 nung süogo

January 19, 2016: Eagles kentener telok tentetsang, Glenn Frey arishi küm 67 lia süogo, ta Eagles telok otongdar kati metetdaktsüogo.
“Glenn hopta aika temang teloktep nung timtemba den külemi, dar tazüng asazüker kangshia liasü. Aji dang masü saka ano pa pneumonia agi dena kangshia lir iba lima nungi pilaogo,” ta parnok telok indang official website ajanga metetdaktsü.
Frey dar mejungi kangshiba yong pai 2015 küm ‘Kennedy Center Honors’ sentong nunga par telok den külemi shilem magitet.
Eagles telok nung mezüng nungi adenertemji Frey den Don Henley, Randy Meisner aser Bernie Leadon nunger liasü aser 1970 küm parnok ya kentener Linda Ronstadt nüngiter kentener telok amai aküm.
Parnok ajak ken tsütsü mongintem dang liasü.
“Onok ajak kanga aoksaogo aser mamangtetba shisabulu agi sünga alir,” ta Henley-i sangdong ka ajanga Hombar nü metetdaktsü.
“Ni tia dak kangbo mamanger, ajisüaka 1970 küm Glenn Lewis Frey den ajurutepba sülen kü taküm jenjang teti asoshi melenshi aser ibaji ajanga alima nung alir nisung million aika dak kongshiogo. Tarutsü nung pa mali iba lima nung liyonga aodang balaka bilemtsü,” ta Henley-i ashi.
Carole King, Huey Lewis aser Travis Tritt nunger den kentener nisung balalai twitter ajanga Frey nem akümtsübo agütsüogo.
1970 küm tum tashi Frey aser par teloki kensep tajung aika adokogo
“Best of My Love,” “Lyin’ Eyes,” “One of These Nights” aser “Hotel California’ kentem dena Frey aser Henley na senteper par teloki adenba ken rongnung tajunga aika züluogo. Iba den külemi, nüburtem ajaki metetba aser nüngtugu ken ‘Take it easy’ Brownee-i züluba mapanga Frey-i yaria liasü.
Frey-i guitar aser keyboard atemba den külemi, “Take it Easy” aser “Tequila Sunrise” ken na aten.
Par telok ya 1980 küm ken paksa ajisüaka 1984 küm ‘Hell Freezes Over tour’ jajaba mapang tanaben lungjem.
Frey taküm alidang “Jerry Maguire” aser “Miami Vice” film tem nunga shilem agia liasü.
“Onok shisabulu aser pai onok meima tushia amshiba ajak o kija agibo merasateter,” ta par telok website ajanga Hombar nü lemsatepa liasü.