Islamic State aser India

Küm tasen tenzükli kiralongrar telok Islamic State-i Turkey yimtiba Istanbul, Pakistan kübok Jalalabad yimti aser Indonesia yimtiba Jakarta nung kiralongraba mapatem inyakogo. Yaküm December ita Paris nung aser California nung kiralongraba lendong atalokbatemji Islamic State-i ajungmesoa inyakba lir ta kuli bushitetba osangtem sangdongogo. Tawa Indonesia nung kiralongraba mapa atalokdang India nungertemi Mumbai amakba bilemteta aruogo, kechiyong Jakarta nunga kiralongrartem telok balala lemsar mapa inyak aser parnoki tongtipang tesemtem dak tenüng yoka kiralongraba mapa inyak. 26/11 2008 nung Mumbai amakba sülen kiralongrartemi kanga dang ratettsü tasak tasatem atonga inyaktsü tenzük ta alima nung counter-terrorism mongintemi ashir. Jakarta nung inyakba kiralongraba mapaji kanga mejungi inyak saka Paris mesüra Mumbai nung atalokba ama nisung takümbo aika melalui songtem, ajisüaka iba tatalokba ajanga ozüng amertemi pei sensosangertem kümzüka meyutetba tensa ajuruba asenoki nguogo. Aji dang masü saka kiralongrartemi aginüba ama parnok media coverage peria dang nguogo, kechiyong reprangdanga arunung ISIS aser tanga kiralongrar teloktemi parnoki inyakba osangji alima ajaklen prokshitsü nükjidong nung mapa inyaker. Parnokisa kijai amakba inyakyim ajungmesotsü atema tasa balala atonga inyaker aser tanga kiralongrar teloktem parnok tangatetba sülen anidaktsü atema mesüa mapa tamajung inyaker. al Qaeda-ibo pei külem Muslim nunger taküm apayua mesüra Muslim nunger nübo timba aliba tamangba teloki parnoki inyakba pusema nungittsüsa mapa inyaker saka Islamic State-ibo iba tebilembaji kecha melii dang inyaker. Yaküm kija nung linük tasen 20 tashi nung Islamic State kongsangtem amenoka ogo aser linüktem rongnung India den kidangsüa aliba linük kar densema lir. Islamic State atema nübo timba anguba tesemtem rongnung Southeast Asia densemogo. Taoba hopta al Qaeda-ia Southeast Asia nung jihad atema mapang temjenogo ta sangoktsüogo. Iba ama mapang ka nung January 26, 2016 nü Republic Day benjungmung nung France Tir Francois Hollande-i tongti tesemdanger ama adentsü aliba dak rangloker India ketdangsertemi security akangshitsü atema mapa inyaker. Kiralongrartem teloksa mesüaka, nisung kijai lendong bener arutsütsü meteta mali aser IS-i ajungmesor kari Republic Day benjungmung mapang kiralongraba mapa inyaktsü akok ta ketdangsertemi arentaka bilemer. Ano, talisa kiralongrartemi Paris aser Pathankot amakba nung ajemdaker US secret service CIA-i  teyari agüja Indian intelligence agencies aser France nungi Directorate General for External Security (DGSE) temi Francois Hollande aser Prime Minister Narendra Modi na lendong nungi kümzüka ayutsü atema mapa inyaker. India nung Islamic State pusema nungiter aika aliba osang bushitetogo aser ano parnok aikati online nung maparen balala inyakba nung ajemdaker sorkari linük nung security inyakyim akangshiba mapang ka lir. Taoba Honibarnü Home Minister Rajnath Singh-i central intelligence aser investigative agencies den state 13 nungi police den senden ka alidang Islamic State indang onük benoka lemsatepogo. Iba senden nung Islamic State-i Republic Day mapang linük kübok tesem mashii ka nung kiralongraba mapa inyaktsü akok ta bilemba onük jembi. Indian intelligence agencies osang ajanga ashiba agi India nunger 23 tashi ISIS nung denogo aser parnok rongnung nisung trokbo tatalokba balala nung tepsetogo. Ano, India nunger 150-i ISIS den tesentaktep lir ta temulung melemi bilemba agi ketdangsertemi parnok dak tenük yoka mitdar. Atangji, India Republic Day aser iba anogo matongdang linük nung nübortem kanga jeretpera kümdanga alitsüla aser lendongtsüdong kecha mataloki iba benjung mungtettsüsa sorkar ketdangsertemia pei teinyaktsü wadang nendaka inyaktsüla.