PM Modi-i Bodo nunger atema sen crore 1000 sangdong

Ato kilonser Narendra Modi-i IIIT Guwahati nung campus tasenba yanglutsü atema  foundation lung sayatsüba noksa nung angur. Noksa nungsa Assam Chief Minister, Tarun Gogoi aser Union Minister tema angur. (Assam, January 19, 2016). 

Guwahati/Kokrajhar, January 19 (Agencies): Mongolbarnü Ato kilonser, Narendra Modi-i Bodoland Territorial Areas Districts-i Bodoland akhangba atemabo mejembi saka parnok nem senotsü teyari crore 1000 sangdongba den külemi pai, Assam nung Bodo nunger aliba tesemtem nung terenlok atema inyaktsü, ta ashi.
Assam, Kokrajhar jila nung Bodoland Peoples’ Front (BPF)-i ayongzükba lokti senden nung jembidang Ato kilonser Modi-i, Bodoland Territorial Areas Districts (BTAD) nung linük nung tangar tesem nung ama terenlok mapa inyaktsütsü, ta ashi.
Paisa, lenden nung aliba Karbi nunger nem Scheduled Tribes (ST) jenjang agütsütsü, tenemlen aliba Bodo Kachari nunger tesem Karbi Anglong aser Dima Hasao district nem-a kobi melii ST jenjang agütsütsü, ta ashi.
Modi-i, “Nenok den külemi longjemer inyakba ajanga nüburtem nem terenlok agütsütsü asoshi ni yagi aruogo. Ni nenok dang züngpong ashir, nenok kü mulungjang nung lir aser ibaji ajanga ni kü teka salaogo,” ta ashi.
Assam nung assembly election agitsü mapang ana nung lia Modi-i BJP atema nüboyim sentong tanü tenzüktsüogo. State nung BJP aser BPF na lokteptsü ama reprangteter. BPF ya BTAD district pezü ketdangsüba tentet Bodoland Territorial Council (BTC) tashi nung lir.
2003 küm BPF tentetba mapang nungi parnok ya Congress den loktepa liasü saka parnok tsüngda mangatettep adoka 2014 küm teloktep raksa.
Modi-i taoba mapang Centre nung Congress-i aniba UPA sorkar aser Assam nung Congress sorkar aija, “Assam nung tebilemtsü onüktem mali ta ni bilema liasü. Küm 10 atema Ato kilonser inyaksang (Manmohan Singh) shimtetba state ji Assam lir. Congress-i taoba küm 15 tashi Assam yimsüsür. Ajisüaka yangi tebilemtsü onüktem angudang ni aoksar. Atangji küm 10 atema state nungi ato kilonser shimtetsangi kechi inyaktsü (?)” ta ashi.
“Parnoki (Congress) tesüiba küm 15 nung kecha meinyaktet, saka parnoki ita 15 tsüngda kü nem ajak inyakdaktsüner. Ibaji tim asü (?),” ta Modi-i ashi.
“Parnoki küm 15 yimsüsüba aser BJP sorkari ita 15 yimsüsüba nenoki nguogo. Linük ajungtsü atema ita 15 tsüngda onoki minute shia inyaka arur,” ta pai ashi.
BTAD tesem nung terenlok atema BPF-i senotsü teyari crore 1000 khanga arur saka Bodo tentet aikati Bodoland nem state jenjang agütsütsü takhangba agütsür.
Ano külen All Assam Koch Rajbongshi Students’ Union-ia Centre sorkari Assam nung Koch Rajbongshis densema kin trok nem ST jenjang magütsüba anema Hombar nü nungi ghonda 48 mokdang ayongzüka lir.
Tanü nikongdang Guwahati nung Modi-i IIIT Guwahati nung campus building tasenba atema lung azüngja liasü.
IIT, NIT kaketshirtem aser Northeast central university kaketshirtem den jembidang Modi-i, 21buba putu ya shisatsü putu ka lir, ta ashi.
“Tanübo alima nung rongsenkettsüng survey balala ajanga, alima nug rongsenkettsüng tekaraba ainba linükji India lir ta ashir,” ta paisa ashi.