T.R. Zeliang-i Indo-Japan Partnership workshop lapoktsüogo

January 19, 2016 nü Hotel Acacia, Dimapur nung Nagaland chief minister TR Zeliang, Minister Economic Embassy of Japan, New Delhi Akio Isomata aser ketdangsertem Indo-Japan partnership workshop tenzükba sentong nung agiba noka angur.

Dimapur, January 19 (TYO) : January 19, 2016 nü Hotel Acacia Dimapur nung Nagaland chief minister, T.R. Zeliang-i Indo-Japan Partnership workshop lapoktsü.
Iba sentong ya India kübok North East nung Infrastructure Development tayongzükba onüktem benoka olemteptsü atema ayongzüka agir.
Taonung sentong lapokja jembidang TR Zeliang-i ashiba agi, North East State ajakji ali agi meketbanga aliba tesem ka lir saka India aser Japan nungi mongin nisungtemi shisadanga mapa inyakba ajanga ali agi meketbanga aliba tesemji lapoktettsü.
Sorkari atongba Act East policy aser Vision 2020 mapa küma meinyaktet lir kechiyong tanü tashi South Asian linüktem den tesentaktep kecha mali, ta paisa ashi.
Alima rara tanabuba nung Japan-i shilem agiba nung ajemdaker olen ka jembidang, Nagaland chief minister-isa ashiba agi, northeast nung Japan-i infrastructure projects takok ngua inyakba ajanga northeast nung lanu pututemi Japan linükji rara den masü saka yimjung aser terenlok den sendaktepa jembitsü.
Paisa, northeast tesem nung highways aser railways, Nagaland nung electricity, security, strategy aser Indo-Myanmar arrtsü nung terenlok mapa dak sendakba onüktem jembisem.
Iba workshop lapokba sentong nungsa Minister Economic, Embassy of Japan, New Delhi, Akio Isomata-i North East region nung connectivity tajungba akümtsü atema jembi.
India kübok Northeast nung connectivity tajungba akümba ajanga Northeast nungertem taküm aser libaliro tajungba akümtsü, ta paisa ashi.
Akio Isomata-isa ashiba agi, Japanese technology ajanga tenem-tekongtem ajangadanga maparen sadema meinyaktetba khuret koktettsü.
Northeast nung local nisungtemi mapa inyakba nung shilem agitsüla aser ibaji Centre aser state temi teyaritep ajanga akoktsü. Onoki partnership agütsütsü aser kibur jibo local nisungtem asütsü. Japan sorkari India sorkar den külemi inyaktsü tenangzükba agia lir, ta Akio Isomata-isa metetdaktsü.
Iba sentong nung Director & C.E. ICRIER Rajat Kathuria-i tesentepertem pela agizük aser Director, India Foundation Alok Bansal-i anküp tepela o jembi.
Indo-Japan Partnership workshop lapokba sentong nung Cabinet Minister, Parliamentary Secretary aser Advisor tem den Chief Secretary, Nagaland aser ketdangsertem aika aden.