4 buba All India Police Archery Championship 2016 tenzükogo

(Abelen) 4 buba All India Police Archery championship 2016 asayamong nung shilem agirtem noksa ka angur. (Achijilen) Nagaland Chief Minister, TR Zeliang-i lasang tendanga kadangtsü renemshiba noksa nung angur. (Dimapur, January 19)

Dimapur, January 19 (TYO): Nagaland Chief Minister, TR Zeliang-i 4 buba All India Police Archery (AIPA) championship 2016 Dimapur kübok Chumukedima nung tentetba Nagaland Armed Police Training Centre (NAPTC) stadium nung tanü Mongolbar nü tenzüktsüogo.
Nagaland police-i tan anogo 5 agia asayatsü ayongba asayamong nung India kübok tentetba state balala nungi State police, Commissionerate aser Central Police Organisations nungi telok 21 tashi shilem agi tenzüka lir.
Recurve, compound aser traditional densemba tetoktepba shilem 3 nung tetsür 81 densema, lasang toktepa kashishir ajak agi nisung 287-i shilem agitsü renema lir.
Asaya shilem 3 dak alaka, telok aser kija tetoktepba agitsü ayonga lir.
“Lasang ya meimchir otsü nung nisungeri taküm kümzüka alitsü asoshi poratetba tongpang oset tejentiba lir. Meimchirtemi akidangbo lasang ya tongpang raratsü, aremshi arishitsü aser saisapongtsü asoshi kanga dang sapua benshi saka tanübo lasang ya saisapongtsü oset tongtipang ka kümogo,” ta Zeliang-i metetdaktsü.
“India-i international jenjang nung ayongba lasang toktepa kashitsütsü tetoktepbatem nung kanga junga shilem agir. Ajisüaka, India tsürtemi international sabang nung teburtem den medal timba ngua lir,” ta shia, lasang toktepa kashishitsü tetoktepba ya Olympics asayamong nunga saisapong shilem tejentiba rong nung densema aliba olen ka pai lemsatep.
“Nagaland nunga teburtem denbo tetsürtemi ang national aser international jenjang nung ayongba tetoktepba balala nung takok timba ngua lir,” ta shia, teburtemi tajungba shilem agitsü tayongzükba ka pai sangoktsü.
“Tan asayamong nung shilem agiba ajanga lasang toktepa kashishir jenti adoktsü imlar. Iba asayamong ayongba ajanga nüburtema lasang toktepa kashishitsü tetoktepba nung shilem agitsü ajungmesotsü imlar,” ta pai shisem.
Chief Minister-sangi asayamong nüngoa ka sayaja liasü.
Iba asayamong shibangba sentong tan January ita 23 nikongdang 3:30 ako nungi tenzüka agitsü sentong renema lir aser iba sentong nung Nagaland Home minister, Y Patton tongti tesemdanger alitsü.