Syria sorkar den yimjung senden mamentsü akok: Hijab

Riyadh, January 20 (Agencies): Syria sorkar den taruba hopta amentsü ayongba yimjung senden nung shilem magitsü bilemba olen ka Saudi Arabia linüki nungitba Syria sorkar anemer teloktep teloki tanü Bodbar nü metetdaktsüogo.
“Syria sorkar aser sorkar anemer na kija sendenji amen nung dang tan ayongba yimjung nung shilem agitsü mulunga lir,” ta Riyadh nung taoba December ita tentetba Syria sorkar anemer teloktep telok lenisang, Riad Hijab-i osang jangjashitsü.
Tan ayongba senden nung telok tangatema jaoka shilem agitsü onük ka Russia-i benoka lir aser iba onükji magizüker ta sayua Hijab-i tanü osangji sangoktsür lir.
“Russia-i Syria’er yimjung senden nem tetsükdakba bener arutsür,” ta shia, Russia aitsüba den külemi, tan ayongba yimjung senden nung sorkar anemertem tenüng nung shilem agitsü asoshi shimba lenir tarensen pai metetdaktsü.
Tanü benokba tenüng tarensen nung Damascus aser Moscow napronglai kiralongrar telok ta züngokba sorkar anemer telok, Jaysh al-Islam lenisang, Mohamed Alloush tenünga densemba osang jangjaogo.
“Syria Tir, Bashar al-Assad-i aniba Syria sorkar anemer opposition teloki Syria sorkar den yimjung senden amentsü renema lir,” ta tan benokba lenir tarensen nung densemer, George Sabra aser Asaad al-Zoubi natia metetdaktsüogo.
Alima tashi abenba linük lenirtemi yimjung senden nung shilem agidaktsütsü opposition lenirtem tarensen tatem küma agizükba sülen ang tan January ita 25 nü amentsü ayongba Syria yimjung senden nung shilem agitsüpur ajunga jaoktsü renemba osang ka United Nations (UN)-i tan Hombar nütu sangokja lir.
US Secretary of State, John Kerry aser Russia Foreign Minister, Sergei Lavrov natai tanü ajurutepa Syria yimjung senden den sentakba onük benoka senden amenba osang jangjaogo.
Taoba küm 5 tejaklen nungi tenzüka Syria nung nisung 250,000 dak tema tepseta tongpang rarabaren anenja Syria nung yimji yimjung tia bener arutsütsü nükjidong nung alima tashi abenba linüktemi Syria yimjung sendenji ayongogo.