J&K: LeT telungpur ka aser lanur ka kahset

Srinagar, January 20 (Agencies): South Kashmir, Pulwama district nung yasüng nungi tenzüka aonung piyong kahtepba mapang security sepaitemi Lashkar-e-Taiba (LeT) telungpur ka kahset, aser tanü sepaitemi lungkak aiter lanurtem dak injang kahloktsüdang lanur ka kahsetogo aser kar yirutsüogo.
Pulwama kübok Naina Batapora yimtsüng nung telungpur aser sepaitem na tsüngda kahtepdang district kübok Awantipora tesem nung alir LeT telungpur Shariq Ahmad Bhat kahset, ta army ketdangser kati ashi.
Tamasabo ketdangseri, iba rara nung telungpur ana kahset, saka tasümang ka dang angu, ta metetdakja liasü.
Yashi nungi LeT züngsem Bhat atsüka aliba kidang nungjagi AK assault rifle ka aser injang kar ngutetogo, ta ketdangserisa ashi.
“Security sepaitemi tasümang bushiba mapang lanurtemi parnok dak lung agi aon tenzük aser police indang gari ka rongtoktsü,” ta police ketdangser kati ashi.
Iba mapang nungji security sepaitemia lanurtem dak injang kahloktsü lanur ka kahset aser lanur pongu yiruogo.
Lanursang tenüngji Parvaiz Ahmad lir ta jangjaogo aser yirua alirtemji Srinagar nung aliba mozüki balala nung yaridar, ta police ketdangserisa ashi.