Isis-i Iraq nung Christian monastery tejentiba samatsü

New York, Jan. 20 (Agencies): Isis jihadist teloki Iraq nung küm 1,400 tejen Christian monastery ka samatsüogo aser iba ya Iraq nung Christian monastery tejentiba liasü.
Bodbarnü Associated Press-i Satellite ajanga tangokba noksatem sayuba nung Mosul nung tenem ka nung St Elijah’s Monastery aliba ajunga rüja kümer lir.
Iraq nung Isis-i amokbanga aliba yimtiji Mosul lir aser taoba mapang rara balala nung St Elijah’s Monastery nung teraksa balaka melii dang aru.
Lung agi yangluba tekülem ki tasazükji 27,000 square-foot liasü aser taktang 26 liasü. Iraq nung US sepaitemi alidang parnoki iba Monastery ya tekülem ki ka ama amshia liasü saka June 2014 nung Isis-i iba yimti atsünga agi.
“Mosul nung asen Christian puti otsü kanga mejungi samatsüogo. Iba inyakyim yagi Christian tem Iraq nungi aridoktsü merangba sayur” ta Iraq nung Catholic priest Rev Paul Thabit Habib-i osangbener dang ashi.
August aser September 2014 tsüngda iba tekülem ki ya raksatsü akok, ta image analyst, Stephen Wood-i satellite images reprangba sülen metetdaktsü.
2013 tetenzüklen nungi Isis-i kiralongraba mapa inyaktsü tenzükdang, parnoki Syria aser Iraq nung St Elijah’s Monastery amala tesemtem samatsütsü ta sangokja liasü.