Rohith soseta asüba atema sen teyari crore 5 akhanger

Hyderabad, January 20 (Agencies): Tawa Hyderabad University nung arishi küm 26 Dalit nunger shisashir Rohith Vemula soseta asüba ken o nung Union Human Resource Development (HRD) Minister, Smriti Irani-i Centre pusemtsü merangaka Bodhbarnüa Hyderabad University nungi kaketshirtemi maneni lungkak aita Irani mesükba noksa rongtokogo.
Centre sorkar aser Irani na anema yimyim ayima Hyderabad University kaketshirtemi Rohith Vemula atema ochi temeten bushija takhangba onük trok agütsüogo.
Kaketshirtemi akhangba onüktemji- Rohith’er kibong nem senotsü teyari crore 5, Rohith’er kinünger ka nem University nung mapa agütsütsü, Vice-Chancellor Prof. Appa Rao Podile mapa nungi anendaktsütsü, University nung Dalit kaketshirtem anema ken o tai benoka aliba agientsü, Dalit kaketshir university nungi anenja aliba agientsü aser Rohit asüba atema aibelenertem nem temerenshi agütsütsü.
Tanep Smriti Irani-i, Rohith soseta asübaji Dalit nunger o Dalit nunger masübatem tsüngda raraba ajanga masü, ta shia liasü.
Lungkak aiter kaketshirtemisa Akhil Bharatiya Vidyarthi Parishad (ABVP) jagi tangsa university campus toktsütsüla, ta takhangba agütsü.
Tanü lungkak aitdang kaketshirtemi Bharatiya Janata Party (BJP) aser Rashtriya Swayamsevak Sangh (RSS) na anema-a yimyim ayima liasü.