Centre-i Delhi Police mapa majeter: Sisodia

New Delhi, January 21 (Agencies): Tanü Brihostibarnü Delhi Deputy Chief Minister, Manish Sisodia-i, Centre-i Delhi Police majeter ta ashiba den külemi Delhi police ji Delhi nung AAP sorkar nem agütsüsüla ta ashi.

Tanü Delhi High Court-i, Delhi Police shimba onük nung kechiba Union sorkari linük yimtiba (Delhi) dang rapitsür ama benshir (?) ta asüngdanga liasü.

High Court-i jembiba o nung ajemdaker Sisodia-i, “Tesüiba ita 10 tashi Centre sorkari Delhi matsüngdang rapitsür ama benshir, ta onoki jembia arur,” ta ashi.

“Delhi police ketdangsütettsüsa Centre-i meinyakteter, kechiyong parnok kijai police force tulu ketdangsütettsüsa parnok dak tashi mali,” ta paisa ashi.

Deputy Chief Minister Sisodia-i, Centre nung BJP-i aniba sorkari Delhi atema temelung magütsür, kechiyong linük yimtiba (Delhi) nung par party sorkar tashi nung mali,” ta ashi.

Tamalen Chief Minister Arvind Kejriwal-ia Ato kilonser Narendra Modi dang Delhi Police ya par sorkar nem agüjang ta mepishia liasü.

Delhi police tasen shimokba maparen dak sentakba ken o ka angadangba mapang Delhi High Court-i, “Nenoki (Centre) sen mechi nung nüburtem dang saru meshir, ibaji nenok senpong nungi meintoker. Ajaki saru agütsür, saka iba melenji parnok lendong nungi kümzüka lir ama (?),” ta asüngdangogo.

“Delhi police atema kechiba Centre-i temelung magütsür’ar mangateter. Kechiba rapitsür ama benshir,” ta High Court-isa shiogo.