Smriti Irani-i linük dang tatok meshitsüla: Kejriwal

Hyderabad, Jan 21: Brihostibarnü Delhi Chief Minister, Arvind Kejriwal-i tawa Hyderabd University nungi Dalit kaketshir ka soseta asüba dak sentakba ken o nung Vice Chancellor mapa nungi agientsü takhangba agütsüogo.

Hyderabad University campus nung kaketshirtem den jembidang Aam Aadmi Party (AAP) tongti lenir aser Delhi Chief minister-isa Union Human Resource Development Minister, Smriti Irani dang, kaketshir Rohit Vemula soseta asüba ken o nung ajemdaker kinkidong onük nung yimtenren politics asayaba atema tatok meshitsüla, ta ashi.

Kejriwal-i, “Vice Chancellor ji tangsa agientsüla,” ta ashi.

“Onoki akhangba onük tanabubaji Smriti Irani-i kinkidong nung ajemdaker politics asayatsü merangogo. Lai linük dang tatok meshitsüla,” ta Delhi chief minister Kejriwal-i ashi.

Kejriwal-isa, “Vice Chancellor P. Appa Rao menden nungi agientsü atema pa (Rao) indang office nung mener lungkak aitsü ni melunga liasü, ajisüaka kaketshirtemi ibaji memelung,” ta ashi.

ABVP kaketshir lenir ka den rara adokba onük nung Rohit densema Dalit kaketshir pongu University nungi anenja liasü. Akhil Bharatiya Vidyarthi Parishad (ABVP) ya RSS indang student wing ka lir aser iba tentetji Bharatiya Janata Party (BJP) den densema lir.

Medical report aser University registrar-i benokba affidavit nung ajemdaker Kejriwal-i, ABVP lenir ka dak teka sangshi, ta asübaji yazü tongloktsüba lir, ta ashi.

Central minister aser BJP lenir, Bandaru Dattatreya-i Vemula aser par medemertem dang “linük anemertem, kin kidong telemsa adokdaktsürtem aser tali bilemoka oa inyakertem’ ta ajaba atema Kejriwal-i minister aitsüogo.

“Khuret abenba Central minister kati osang tejangja mebushii, Vemula adenba telok, Ambedkar student group ji telemsa adokdaktsürtem aser linük anemertem ta ajabaji taaktsü ka lir.

“Vemula ya aluyimer ka jabaso lir aser pa ya ‘merit’ nung ajemdaker University nung admission agia azüng. Pa ama kaketshir tajung ka soseta asütsüsa akumabaji lokti ajak atema maaksü,” ta Kejriwal-isa shisem.