Samsung-i Gear VR headset den Gear S2 smartwatch sayaogo

New Delhi, January 21, 2016 : South Korea nung electronic oset yanglur rongnung tetsüti Samsung-i Brihostibarnü India atema Gear virtual reality (VR) headset den Gear S2 smartwatch sayatsüogo.
Gear VR ya Samsung Galaxy smartphone tem den Galaxy Note 5, Galaxy S6 edge+, S6 aser S6 edge nung amshiteter aser iba oset ya Samsung retail dokan ajak aser Flipkart nung sen 8,200 agi talitsü angutsü.
“Gear VR yagi tamshirtem nem ken aser ola balala angashiba tsütsü tajangshiba tajung agütsütsü,” ta Samsung India marketing IT & Mobile nung director Manu Sharma-i osangbenertem den jembiba mapang ashi.
Tamshirtemi iba headset nung aliba Oculus Store nungi 2D aser 3D video tem den games 150 dak tema download sütettsü aser itemji 360 degree tashi nungi, movie hall nung 3D video reprangba mesüka reprangtettsü.
Cushion tanük aser tepongba den tatsü o talang küma atsüshitetba telenitba enoka yangluba agi Samsung Gear VR ya tekolak nung kanga junga aser anisüngzüka semoktetter. Iba nung ya tenük agi reprangtsü asoshi tesem tulu lapokja lir aser ibaji ajanga tenük aina kalokertema kecha timtem melii reprangteter.
Iba oset nung call aser SMS aruba metettsü asoshi ‘Pass-Through’ enokja lir.
Ano Gear S2 smartwatch-a tapu ana nung angutsü—- Gear S2 aser Gear S2 Classic. Gear S2 ji sen 24,300 aser S2 Classic sen 25,800 agi talitsü angutsü.
“Samsung Gear S2 ya tamshirtem anisüngzüktsü oset tajung rongnung ka lir,” ta Sharma-i ashi.
Samsung Gear S2 aser Gear S2 Classic ya Samsung-i anütettsü telonglong yangluba rongnung mezüngbuba lir.
Iba anütettsü nung S-Health enokja aliba ajanga temang exercise agiba den tennis, cricket aser golf asaya nung tetuyuba agütsür.