IS-i Modi aser France Tir Hollande na amaktsü akok

New Delhi, January 21 (Agencies): Brihostibarnü Intelligence Bureau (IB)-i, January 26 nü linük yimtiba Delhi nung Republic Day benjungmung nung ISIS-i Ato kilonser Narendra Modi aser France Tir, François Hollande na amaktsü akok, ta metetdaktsüogo.
Security agency IB-i iba osang metetdaktsüba sülen India Gate aser Rashtrapati Bhavan na nung sepaitem kanga kümkümshiogo.
IS kiralongrartemi Paris aser Jakarta amakba yimya nung India-a amaktsü akok ta IB-i sangdongba sülen India nunga India Gate den külemi nüburtem longsoa aliba tesemtem aser tongtibang kiojentem nung sepaitem kümkümshiogo, ta osang ajanga ashi.
Delhi police tongti ketdangsertem aser tanga security agency tem senden ka mena lendong nokdangtsü asoshi security ring yanglutsü lemtetogo.
Iba senden nung, tesem aika nung security ring yanglutsü aser anünglen nungi aser injang kanga mezünga akartemi Modi aser Hollande na anüktsü lemtetogo.
Ano külen Defence Minister, Manohar Parrikar-i, IS-i Modi tena amaktsü amokmerenba shidi ka Goa Secretariat dangi aruba osangji tai ta shiogo.
“Ato kilonser Modi küna amokmerenba mali. Ibaji (amokmerenba shidi) poisa 50 postcard ka nung sign süa lir,” ta ashi.
Ajisüaka Goa Police-i amokmerenba ken oji Goa Anti-Terrorist Squad (ATS) nem agütsüogo.