US-i World Refugee Summit ayongtsü: Kerry

Davos, January 22 (Agencies): Tongpang raraba, kiralongrartemi lendong bener arutsüba aser iba amala timtem lendong balala atalokba ajanga adoktsüba refugee nisungtem den sentakba khuret bentettsütsü asoshi alima linük ajungai bendanga agüja nungdakba maparen inyaktsü tajungshiba olen ka US Secretary of State, John Kerry-i tanü, Hokolbar nü ayongzükogo.

Tan Switzerland kübok Davos jila nung amenba World Economic Forum senden nung o jembia shilem agidang Kerry-i tanü iba olenji metetdaktsü.

United Nations (UN) tesepti, New York yimti nung alima ajunga den sentkba refugee senden ka taküm, 2016 küm ayongtsü sentong US Tir, Barack Obama-i renemba osang ka Kerry-i tanü senden nung metetdaktsü.

“Tang pei linük toktsür bendanglen jenoka alir refugee nisungtem indang taküm jenjang tajungba kümdaktsütsü maparen nung alima linüktem nungi dang masü saka lokti tentet balala nungia teyari nungdaktsü,” ta pai shisem.

United States-i taküm 2016 küm November ita tashi nung refugee nisung 85,000 tashi par linük jenokdaktsütsü aser taruba 2017 küma refugee nisung 100,000 shi maneni jenoka lidaktsütsü alizüng yua lir.