Lisopuri ST angutsü atema ULFA teyari meshir

Guwahati, January 22 (Agencies): Centre nungi scheduled tribe (ST) jenjang agutsü atar, Assam nung kin troki state nung aliba kin ajak dang parnoki akhangba nung nungittsü atema ULFA dang nungi teyari meshiogo.
General secretary Anup Chetia-i aniba Ulfa nungi iba ken o jembir rongnung tanishirtemi kin trok nungi züngsemtem den Silpagram tebilemtsü atema Guwahati nung ajurutep.
Koch-Rajbongshis, tea tribes, Tai Ahoms, Morans, Motoks aser Chutiyas kintem nem ST jenjang agütsütsübaji Ulfa telok indang nükjidong tulutiba lir.
Kin trok nungi züngsemtemi Ulfa dang iba tebilemtsü anemertem, anünga aliba lisopur ajak iba takhang nung dendaktsütsü merangang, ta asüngdangogo.
All Koch Rajbongshi Students’ Union (AKRSU) nungi Hitesh Barman-i, “Kin troki akhangba ya shitak lir, ajisüaka anünga aliba kin teneti anemba ajanga tebilemtsü adoker. Anungji onoki iba tebilemtsü koktettsü mechi nung Ulfa dang teyari meshi,” ta ashi.
Chetia-i, “Onoki February ita nung lisopur ajak atema sentong ka ayonga akatsü. Kin troki ST jenjang akhangba nung Ulfa-i nungiter. Iba sentongji Guwahati nung February mezüng hopta nung akatsü akok,” ta metetdaktsü.