Aor lokti tentettemi ‘P&AR Office Memorandum’ magizüker

Dimapur, January 22 (TYO) : Ao Senden, Watsü Mungdang, Ao Kaketshir Mungdang aser Mokokchung Town Lanur Telongjem nungeri Mokokchung Deputy Commissioner dangi tezüluba ka nung November 16, 2015 nü ‘Personal & Administrative Reforms Office Memorandum’ magizüker ta metetdaktsüogo.
P&AR office ajanga tetuyuba agütsübaji Mokokchung district nung aliba lisopurtem anema lir aser iba jagi Aor asoshi tentetba teloktemi iba tetuyuba magizüker, ta Ao Senden Tatong Tir, O Shilu, Watsü Mungdang Tir, Moachila, Ao Kaketshir Mungdang Tatong Tir, Akummeren Longchar aser Mokokchung Town Lanur Telongjem Tatong Tir, Martoshi Jamir nungeri külemi züluba shidi nung shia lir.
January 20, 2016 nü AKM office nung telok balala nungi teshimtet nübotem adenshia senden ka agidang November 16, 2015 P&AR Office Memorandum indang onüktem benoka olemtep.
Senden nung adenertemi kanga junga shisadanga tebilembatem lemsatepba sülen Mokokchung Deputy Commissioner office kübok Grade IV mapa ajak nung Aor tem dang shimoktsü aser P&AR Office ajanga Grade IV mapa noklang nung shilem 25 mekazüka yutsütsü shia alibaji magizüktsü telemtetba agi.
Ano, Deputy Commissioner kübok Dobashi pur indang Grade-III mapa direct recruitment ajanga shimtsüla aser mapa nung district nung aliba Aortem dang shimoktsüla, ta senden nungsa bangjemtep.
Iba takhangba ya August 16, 2013 aser June 30, 2014 anogotem nung Ao Senden-i Deputy Commissioner dang Mokokchung Customary Court nung tanga kin nungi Dobashi tem meshimtsü atema züluba shiditem pusema nungita lemtetba lir.
Senden nungsa, Mokokchung district nung backward tribes asoshi Grade-III posts shilem mekazüka yutsüba inyakyim magizüktsü bangzünga renem.
Grade-III mapatem asoshi shilem kecha mekazüka meyui Nagaland nung lisopurtem ajak open competition ajanga dang shimtsüla aser iba mapa nung nisung shimokba inyakyimji taitsü makai inyaktsüla aser tajungertem dang shimtsüla.
Item telemtetba ya Mokokchung district nung alir lisopurtem temeten aser tagizübatem kümzüka ayutsü tangatetba nung agi aser iba nung ajemdaker ‘P&AR Office Memorandum’ ji magizüker. State sorkari temalen shia aliba temetongshitem agizüka memelenshii November 16, 2015 nü P&AR Office Memorandum mapa küma inyakra, onoki iba inyakyim anema noktaktsü aser iba tebilemtsüji state sorkari abentsü, ta Aor tongti teloktemisa shidi nung shia lir.