Nagaland nung Veterinary Science College ka lapoktsü

Dimapur, January 22 (TYO) : January 22, 2016 nü Nagaland sorkar aser Central Agriculture University, Imphal tsüngda College of Veterinary Science, Nagaland yanglutsü atema tenangzüktep agiogo.
Hokolbarnü Chief Secretary conference hall nung Peren district kübok Jalukie nung Veterinary Science College lapoktsü atema tenangzüktepji agia liasü.
Iba college nung Board of Management, Central Agriculture University, Imphal, Manipur nungi temelaba agia Veterinary indang course balala den tanga tesentaktep course tem sayutsü.
Iba ya alizüng ka atongba lir aser MoU agitepba sülen Jalukie nung CAU Veterinary College indang maparen tekaratiba nung tenzüktsü imlar, ta Nagaland Chief Secretary, Pankaj Kumar-i tanü ashi.
Tanü MoU agiba sentong nung Nagaland tenüng nungi Chief Secretary, Pankaj Kumar, IAS aser CAU tenüng nungi Registrar, Dr. P. Madhusoodanan Pillai nati tamaitsü tenüng züluok.
North East nung alirtem asoshi aluyimbaji kanga tongtipang aser CAU ajanga mapa tilaka inyakba ajanga aluyimba maparen nung teyari angutsü imlar, ta tanü Registrar CAU, Imphal-i ashi.
Commissioner & Secretary, Veterinary & Animal Husbandry, M.K Mero-ia o jembidang ashiba agi, north east nung Mizoram sülen Veterinary college tanabubaji Nagaland nung lapokbaji asütsü.
Jalukie nung college lapoktsü atema Veterinary department indang ali acre 266 lease nung agütsüogo, ta paisa ashi.
January 21, 2016 nü Peren nung Nagaland tenüng nungi Peren DC, Peter Lichamo aser Vice Chancellor CAU, Imphal tenüng nungi Registrar, CAU, Imphal nati lease deed atema tenangzükba agia liasü.