Canada High School nung nisung 5 kaset, 2 yirutsü

Canada anülulentip tsütsülen, La Loche jila nung tentetba La Loche Community School kimalen gari ishika anena aliba noksa nung angur. Kidang mangatettep adoka raratepba sülen nisung kati tongpang nung amshitsü prangpong amshia iba school telung nung nisung 5 tashi yashi, Hokolbar nü kaseta lendong atalokdaktsüba osang jangjaogo. (La Loche, January 23)

Davos, January 23 (Agencies): Canada anülulentip tsütsülen, Saskatchewan province nung tentetba high school ka nung nisung 5 kasetba aser nisung 2 tashi yashi Hokolbar nü yirutsüba osang ka Canada Ato Kilonser, Justin Trudeau-i metetdaktsüogo.
“Tan lendong atalokdaktsür ta temulung melemi bilemba nisung ka pua ayuba osang jangjaogo,” ta tang Switzerland kübok Davos jila nung amenba World Econoic Summit senden nung shilem agisang, Trudeau-i metetdaktsü.
“Saskaton yimti nungi anüdoklentip tsütsüleni kilometer 600 shi pilar nütsüng yongsük nisung 3000 shi alidak, La Loche jila nung tentetba high school nung tan lendongji atalokba osang jangjaogo,” ta Canada police ketdangsertemia osang jangjatsü.
“Tan amaksang’er kidang mangatettep adokba sülen amaksangi school kidang lendong atalokdaktsüba osang jangaogo. Ajisüaka, kechi timtem ajurua tan amaksangi lendongji atalokdaktsü iba osangji tang tashi mejangjateti lir,” ta La Loache nung acting mayor, Kevin Janvier-ia metetdaktsü.
Ano külen, La Loche police-i tan lendong atalokba den sentakba osangtsüsang alima den lemsateptsü memulungi aliba osanga jangjaogo.
Royal Canadian Mounted Police-i tan lendong den sentakba bushisüngdang tembanga magi tashi school shibanga ayutsü renema lir.
“Tan La Loche jila nung atalokba lendong ya Canada ajunga nung lendong tesashitiba ajurur lir,” ta Federation of Saskatchewan Indian Nations lenisang, Bobby Cameron-ia metetdaktsüogo.
Kidangsüa aliba United States dang nungi tongpang nung amshitsü prangpong ozüng tesashiba benokba Canada linük nung tan ama ken nung nisung aika tepsetba lendongtem kanga ajema ataloker.
Tesüiba mapang, 1989 küm Montreal yimti nung tentetba Ecole Polytechnique nung kaketshir nisung 14 tashi prangpong injang agi kaseta lendong atalokba sülenbo Canada-i tan lendong tesashitiba ajurur lir.