Sorkari Pak arrtsülen Israel-i atsü atsüba yimya amshitsü

New Delhi, Jan. 24 (Agencies): India-Pakistan arrtsülen nungi ozüng alema linük telungi aitba nokdangtsü atema India-i Israel linüki atsü atsüba yimya amshia atsü atsütsüa akok.
Tawa kiralongrartemi Punjab nung Pathankot airbase amakba sülen India sorkari iba mera agitsü telemtetba agir. Pakistan nung amenoka aliba JeM kiralongrartemji arrtsülen adena aiter Pathankot amak. Iba sülen senden aika ayonga amendang, India-Pakistan arrtsülen nungi bendanger aitbaji magizüktettsü ta lemteta liasü. Item senden nung Union Home Minister Rajnath Singh aser National Security Adviser, Ajit Doval densema sorkar tongti ketdangser aika dena liasü.
“Item ama senden ka nung, India-ia Israel linüki arrtsülen atsü atsüdangba yimya amshia anüdoklen aliba arrtsülen atsü atsütsü akok asü (?) ta o lemtepa liasü,” ta Home Ministry ketdangser kati ashi.
2014 küm November ita nung Home Minister Singh-i Gaza nung arrtsü outpost ka semdanga liasü, iba mapang nung Israel linüki border security system technology amshiba ajanga pa kanga temelung süa liasü.
Israel-i arrtsülen anüngdang long-range camera tajungtem amshir aser aonung third generation thermal imagers amshir.
Iba mapang nungji Israel Ato kilonser Benjamin Netanyahu-i Singh dang, arrtsülen kümzüka ayutsü atema Israel-i India den par technology lemsateptsü melunga lir ta shiogo, ta osang angazüker.
Alima nung arrtsülen kümzüka ayuba system tajungtibaji Israel linük amshir ta jembir.
Ibaji sepaitem dang nungibo technology dak tuluba keta lir.