GPRN/NSCN nem saru magütsür ka züka merenshiba aitsür : ACAUT

Dimapur, July 20 (TYO) : July 19, 2015 nü Kuhoi Camp telung nung Capt. Hutoshe-i Orchid departmental store, Dimapur nung inyaker Kahoto Zhimo züka merenshiba kukua aitsür, ta ACAUT Nagaland-i sangdong ka nung metetdaktsü.
Mezüng nungbo pai saru magütsüba atema aija züka merenshi aser tatem pai Indian Army nem osang sangoktsür ta aitsü. Iba sülen Kahoto Zhimo amokmerena ‘Bond Agreement’ ka nung sign südaktsü, ta ACAUT sangdong nung shia lir.
“Dimapur town command/züngsemtem kar danga duty inyakdang India nunger sepai nem pudaktsüra, iba tebilemtsü khuretji Kahoto-i abentsü….” aser “Ni temalen nangzüka aliba nung aibenlenra kü den Harjeet Singh (Orchid kibur) naprongla tasüba temerenshi agütsütsü aser iba asoshi sorkari khuret kecha mabentsü” ta ‘Bond Agreement’ nung zülua lir.
Iba ‘Bond Agreement’ ya masadangi aser mebilemdangi nisung tepsettsü amokmerena yangluba lir aser iba ya Meimchir Temeten anema lir. Aji agi ACAUT-i iba tenangzüktep ya tagidak mali ta züngshir, ta sangdong nungsa shia lir.
October 31, 2014 Kohima public rally nung saru magütsüba atema nisung kar danga amokmerena mesüra teka sangshira nübortemi magizüktsü ta telemtetba agia lir. Anungji ACAUT Nagaland-i Dimapur nung shishilembartemi iba tatalokba atema tim mapa inyakang ta tetuyuba agütsür. Iba denji külemi state sorkari tenangzüktep agia aliba kuli nung ammeter tekaratiba nung meimchir anema inyakertem puang ta ACAUT Nagaland-i akhanger, ta Media cell, ACAUT Nagaland sangdong ajanga metetdaktsüogo.