ISIS tanurtemi PM Modi tepsettsü merangtsü akok

New Delhi, January 24 (Agencies): Intelligence agency temi, Republic Day anogomung (January 26, 2016) nung kiralongrar telok Islamic State (IS)-i Ato kilonser taküm agitsü sentong atongdar, aser iba atemaji parnoki arishi küm 12 nungi 15 tsüngdapur amshia pei sasa bomb pokdakja amaktsüa akok, ta tekümdangtsü metetdaktsüogo.
Raraba oset aser tapoktsü amshitsü atema training junga agia alir arishi küm 12-15 tsüngdapurtem arrtsülen nungi linük telungi aita alitsü amai temulung melemi bilemer, ta Intelligence agency temisa metetdaktsü.
Linük amaktsü akok ta osang metetdaktsüba sülen NCR police aser intelligence unit tem tali kümkümshiogo.
Yaküm Independence Day anogomung nung Ato kilonser Modi-i Red Fort nung pa indang gari nungi ayazüka aluba sülen school tanur telok ka ajurutsü atema aodang pai pa anükba security cover nungi atsünga oa liasü.
Iba ama maongkaji agia takümbo ISIS-i school uniform nung tanurtem amshia pei sasa poksetba bomb amshia Ato kilonser amaktsü akok, ta Intelligence osang ajangasa ashi.
Intelligence agency-i tekümdangtsü metetdaktsüba sülen Modi dang takümbo Republic Day anogomung nung SPG security cover meraksatsü atema mepishiogo.
Tawa IS-i sayaba video ka nung arishi küm 12-18 tsüngdapurtem machine gun aser rocket launchers amshitsü sayuba sayaogo.