Nagaland aser Assam arrtsülen yimjung atema MLA-temi inyaker

Mariani, Jan. 24, 2016 (TYO): Nagaland aser Assam arrtsülen mapang-mapang shia mangatettep adoka raraba mapatem ya anendaktsür state anaprongla tesünep nung alitsü nükjidong nung arrtsülen Nagaland kübok Alongtaki assembly constituency nungi MLA, Dr.Benjongliba Aier aser Assam tsütsü Mariani assembly constituency nungi MLA, Wb. Rupjyoti Kurmi na tanü Deobar nü Mariani nung Border Peace Coordination Committee (Assam-Nagaland) telok nung Co-Ordinator kidang ajurutepa sensaksemba mapang tajung ka agiogo.
Iba senden ya taoba küm anasemka tsüngda arrtsülen teti state ana tsüngda mangatettep adoka raraba sülen mezüngbuba akar asütsü. Taoba küm ana jakdang memetetba nisung kari Naganijan süngo lu nung inyaker Assam nunger tai maketba nisung ka tenüng agi, Sanjay Bhumij tepsetba ajanga state ana tsüngda mangatettep adoka Assam nungertemi Naga nungertem mesenzüdaktsütsü asoshi Highway lenmang dena shibanga ayu.
Ano, külen Ao Sendenia Assam nungertem den Aor shinga shishilemba masütsü asoshi telemtetba agia liasü.
Iba ama tatalokba ajanga BPCC(A-N) nung züngsem purtem ita trok tashi nükenbelem agia inyaker state ana tsüngda yimjung yanglutsü.
Ano, yaküm küma Assam nung Rankham yim anasa Yajang nungertem parnok lu nung inyaka alidang, Rankham yimtak nungi nisung kari süngo lu yimnüba ajanga  parnoki Rankham nunger ajioker Yangjang nunger nem alu meyimdaktsütsü asoshi nokdangdaktsü. Iba sülen Assam police atur külen Naga nungertem nem parnok lu nungji alu meyimdaktsüi sotba ajanga state ana tsüngda mangatettep tulu adoka tensa mejungi liasü.
Iba ama tesüiba mapang nung atalokbatem mataloktsüsa Alongtaki aser Mariani MLA na ajurutepa jembiba sülen parnoki pei pei nübortem  nem tangatetba agütsütsü aser pei mulungba mapa tamajungtem meinyaktsü asoshi telemtetba ka agiogo. Parnokisa Assam aser Nagaland tsüngda yimjung nung alitsü asoshi mapang-mapang shia BPCC (A-N) teloki sentong tapu balala ayongzüka alitsü atema nungloktsü.
Ano, kasa senden nungsa MLA anati Gabharo yimtak “Gabroo Fest-2016” benjongmong sentong ka ayongzüka amongtsü telemtetba agia liasü.
MLA anapronglai arrtsülen alir nübortem ajak dang state ana tsüngda mangatettep madoki timi terenlok mapa inyaktsü asoshi tangatettep nung alitsü atema tayongzükba ka agütsüogo.