Mumbai Rotarian züngsemtemi Nagaland yaritsü: Angh

Kohima, July 20 (TYO) : Mumbai nungi Rotarian züngsemtemi Nagaland nem health aser shisaliok bushiba tsütsü teyari agütsütsü aser ano Indian National Fellowship Centre Mumbai-i university tem nung North East nungi lisopur oshi 5 enoksemtsü mulungogo, ta Nagaland Angh P B Acharya-i metetdaktsü.
Hombarnü Raj Bhavan nung osangbener senden ka alidang, Angh-i ashiba agi Mumbai nungi Rotarian züngsem kari Peren district hospital nem X-Ray Machine ka, nija school ka nem School Bus ka aser Kohima nung yim ka asoshi metsümeshidak yanglutsütsü nangzükogo.
Item mapatong asem nung sen lakh 25 shi endoktsü, ta PB Acharya-i ashi.
Ano, Rotarian kati Nagaland nung aliba school aser reju balala nung e-learning atema sen lakh 60 tenlatsü mulungogo, ta Angh-isa shisem.
Acharya ya Mumbai nungi lir aser paisa ashiba agi, India nung tribal oshi sayutsü atema university ka danga mali, aji agi Indian National Fellowship Centre Mumbai-i Mumbai nung university balala nung Northeast oshi pungu ita trok atema tendanga tenzüktsü lemtetogo.
Item oshitemji Nagaland nungi Angami, Meghalaya nungi Khasi, Mizoram nungi Mizo, Assam nungi Bodo aser Tripura nungi Reang nungertem lir.
Item ajak ya pa yaküm December ita nungi Nagaland nung Angh inyaktsü tenzükba sülen Nagaland aser Mumbai nung alirtem tsüngda shisa lemsatepba sentongtem agiba ajanga koktetogo.
Tanü agiba senden nung School Education Minister, Yitachu aser Health & Family Welfare Minister, P. Longon na den department ketdangsertem liasü.