Anupam Kher Padma Bhushan aser Ajay Devgan Padma Shri angutsü

New Delhi, January 25, 2016: Sorkari Bollywood actor Anupam Kher aser Ajay Devgan na nem Padma Bhushan aser Padma Shri sempet agütsütsü ta angashia iba sempet agutsü asoshi pelar ta ashi. Megastar Rajinikanth’er jalaia tebu nem Padma Vibhushan agütsütsü ta angashia la pelaba lemsatepogo.

“Kanga pelar, joko Appa-a Padma Vibhusan Shri Rajinikanth kümogo,” ta Rajinikanth’er jala ana rongnung ka, Soundarya-i twitter ajanga lemsatep.

Actor tain Anupam Kher-i, “Kü nem Padma Bhushan lemzüktsüba atema pelar, tila akümer aser tejak tenteta bilemer. Ibai ni asoshi osang kanga tajung lir, Jaihind,” ta twitter ajanga lemsatepogo.

Actor aser film yanglur Ajay Devgan ya tang Bulgaria nung pai yangluba “Shivaay” film tetangokdak lir aser pai, “Ozü linüki küm nema iba ama akhümket sempet lemzüktsüba atema tila akümer aser tejak kanga tenteter. Iba osang angashia kü mapa nunga tali bendanga agütsüshir,” ta ashi.

“Iba sempet anguba ajanga ano kü mapa nung tali nendaka inyaktsü mapang bener arutsür aser ni ozü linük ni akok tashi tenzüktsü,” ta pai shisem.

2011 küm Padma Shri agizükla, pa kinüngtsü Kajol-i, “Kibongi ano Padma Shri sempet ka aitsü. Ni meimsang nem kanga dang tejak tenteta tetushi agütsür,” ta twitter ajanga lemsatep.