Australia nungi ‘Miss Universal’ atema India tsür ka shimtetogo

Suva, July 21 (Agencies): August 18 nungi 30 tashi Dubai nung ayonga aliba, 2015 “Miss Universal Peace & Humanity” tetoktepba nung Australia linük tenüng nung shilem agitsü asoshi, Fiji nung asoba India tsür model, Pooja Priyanka shimtetogo, ta Mongolbar nü media ajanga metetdaktsü.

“Dubai nung ayonga aliba sentong aser tetoktepba nung, ozü linük Australia tenüng nung shilem agitsü asoshi ni shimtetba ajanga ni kanga ajemalua aser ulua bilemer,” ta Priyanka-ia Facebook nung post asüba Fiji Times ajanga metetdaktsü.

“Linük 80 dak tema nungi tetsür tebur tajungtem ajurutsü kanga yongyar aser parnok den külemi tanü alima tensa majung indang lemsatepa inyaktsü matateter,” ta tsüngsanger, actress aser model, Priyanka-i ashi.

International “Miss Face of Beauty” 2014 tetoktepba nung lai tanabuba jenjang nung takok ngua liasü.

Miss Universal Peace & Humanity 2015″ ya international beauty contest ka lir aser iba ya International Human Rights Commission (IGO) dang nungi temelaba agir külen ‘World Peace Mission Organisation-i’ tenzükba lir.

“Iba tetoktepba ya “Yimjung” omen nung ajemdaker linük ajak nung tangatettep, yimjung aser tesünep bener arutsü nükjidong nung tenzükba lir,” ta parnok website nung shia lir.

India nung sor model nungi actress akümla, Ruhi Singh-i 2014 küm iba tetoktepba nung mezüngbuba jenjang nung takok ngua liasü.