Homs yimti nung pokshiba lendong 2 atalok; 22 shi pokset

Syria kübok Homs yimti nung tentetba Zahraa kiyong nung pokshiba lendong ana tashi atalokdaktsüba sülen nüburtem lendong atalokdak sentepa aliba noksa nung angur. (January 26)

Beirut, January 26 (Agencies): Syria sorkari agia aliba Homs yimti nung bomb lendong tesashi ana tashi tanü Mongolbar nü atalokdaktsüba osang ka sorkar ketdangsertemi metetdaktsüogo.
“Peisasa pokseta asütsü mulungteter kati car gari nung alenokba bomb tesashi ka mitkar checkpoint ka nung pokdakja lendong atalokdaktsüba sülen peisasa pokseta asütsü mulungteter tanga kati pa temang nung alenokba bomb pokdakja tanabuba lendong atalokdaktsüba osang jangjaogo,” ta Homs governor, Talal al-Barazi-i metetdaktsü.
“Tanü lendong nung ishiba agi nisung 22 shi poksetba aser nisung 100 dak tema yiruba osang tang tashi nung jangjaogo,” ta pai osang jangjashitsü.
Tanü lendongji par züngsemtemi atalokdaktsü ta shia, Islamic State (IS) ta ajaba kiralongrar teloki tanü lendong atalokdaktsüba atema tenüng agia metetdaktsüogo.
Tanü Zahraa kiyong nung lendong atalokdaktsüba sülen nisung pokseta yiruba den külemi, anasa anena aliba garitem rongdokba aser anameta tentetba dokan o nisung aliba ki aika kanga mejungi raksatsüba osanga jangjaogo.
Syria nung tentetba yimti tulu tarensen nung tasembuba, Homs yimti nüburtem ya Syria Tir, Bashar al-Assad-i aniba sorkar anema 2012 küm nokdaker rong nung mezüngpur aliba osanga jangjaogo.