Thailand general election sentong 2017 küm agitsü: Prayuth

Thailand Ato Kilonser, Prayuth Chan-ocha (Abelen)-i Bangkok yimti nung osangbener den ajurutepba noksa nung angur. (Bangkok, January 26)

Bangkok, January 2016 (Agencies): Nüburtemi Thailand linük temzüng tasenba magizük aka, Thailand linüki general election sentong taruba 2017 küm agitsü renemba osang ka Thailand Ato Kilonser, Prayuth Chan-ocha-i tanü Mongolbar nü metetdaktsüogo.
Southeast Asia nung tentetba Thailand linüki taoba küm 10 shi yimtenren mangatettepbaren tulu ajurua arur külen 2014 küm nungi tenzüka mitkar lenirtem nem agütsüba linük yimsüsütsü tashi agiena maneni democracy yimsüsütsü yimya benoktsü alizüng yua lir.
Linük temzüng tasen ka latetshiba sülen ang par linüki general election sentong agitsü nangzüktepa liasü.
Ajisüaka, nüburtem rong nung vote bendena linük temzüng tasenba agizüktsü mapren meinyak aka, par linüki linük temzüng tejenba kübok general election agitsü sentong renemba osang ka Prayuth-i tan sangoktsür lir.
“Nüburtem rong nung vote bendena linük temzüng tasenbaji agizüka meyu aka, Thailand linüki taruba 2017 küm general election sentong agitsü renemogo,” ta mitkar lenisang menden abendang,  2014 küm tashiyim agi linük yimsüsütsü tashi benoksang, Prayuth-i tanü metetdaktsü.
2017 küm general election sentong agitsü telemtetba ya mitkartemi tentetba aser Prayuth-i aniba National Council for Peace & Order (NCPO) teloki agir lir.
Bangkok nung tentetba mitkar sorkar aser tesüiba Thailand Ato Kilonser, Thaksin Shinawatra na pusemertem telok ana tashi küma Thailand nung tanga yimtenren mangatettepbaren magienteti lir.
Tashiyim agi linük yimsüsütsü tashi anaben tashi agiba, election sentong 5 ben aser sorkar o nübur na tsüngda rara adokba taoba küm 10 shi süidaktsüba ajanga Thailand nung nisung jenti asüba osang bushiteta lir.
Mitkartemi tentetba luden kati renemba sülen 20 buba Thailand linük temzüng  nüburtem dang tan Hokolbar nü sayatsü sentong renemba osanga angazükogo.