Naga yimten

– M. Meren
Ex. Pastor, Ungma

Tawa to naga yimten latettsü asoshi joko mapang tonga aruogo, anungji ajaki sarasadema pelaseta atang ta sangdonga aoba osang angashia kanga dang pelaseta liasü saka tangbo ano lila kümshia langtsüngshi aluba tia ka nung lir. Tetsür tanur nu asotsü ita anogo agi matong ser tebok ango tenzükba ama, Naga nüchiso bushir tsüngda obang memedem, aser o renema mejembi aser nütsüng nübortem danga Centre den jembitsü item item amala jembitsü molunga lir mali taka majurutepdang ser NSCN-IM o India na August 3 nung kechi renema jembi aji tang tashi opok mabar aser maparen ajak renema jembiogo tabo jembir saka telong nung kechi renema aka ibajibo nübori memetet, aser renema akaba nungji  Naga kin asoshi kanga meputep kar densema lira tesülen asen kin asoshi aji tetsükdaktsü tulu alitsü aser iba jagi asenok akoksatsü, koba tanü Nepal lima yimsüsürtemi nübor tia masadangi temzüng ozüng tasen yangluba ajanga tanü Nepal lima tesüngmangtsü lendong ataloka aruba asenoki angashir anungii telong nung alir ajak den nütsüng nübor ajaki molungba nung Naga yimtenji latetttsüla.
1951 May 16 nung Naga nunger 99.99 tashi agi onoki nüchiso aginür, joko nenok India nunger küpok onok malitsü ta meyongnem (Plebiscite) agiogo saka ibaji tanaben agishitsü kenyongi menüngdaker. Naga nungeri kechi temolungtetba agi telemtetba shitak nung meyongnem nema India nunger Parliament sabang tongtsüogo aser alima kin telongjem table tongtsüogo aji teperi. Iba telemtetba Meyongnem dak ajemdaker faction ajaki idakji nokdaka lir.
Saka Naga nunger tang tangatetba tanü iba jenjang nung lia Plebiscite agishi nungbo noklang 90-i India den dang lidi ta ashitsüa shibai metet? Saka tang Naga nunger nüchi tia bushir telok kwi ali ajak denji tema nung alir nübor ajak ta ser tang koba Centre sorkari koba tashi ka nung asenok salangji latettsütsü ibaji asadanga bilemdanger jungaka mejungaka joko asenok ajak yangi metemdi, kechiaser asenoki nüchiso shitakbaji atadang putu kwi aotsü memetet. Anungji ibaji tarutsü lanu putu bushiang saka tangbo yangi metemdi ta latetra aji nüchiso masü no ? Saka tanü Naga nungeri nüchiso shitakbajisa ta noklang nung noklang akangbaji pokboi mesangjang amen ataba ama asütsüa shibai metet? Kechiaser Naga nunger meloksadang yimten sabang ka ser aru tashi nung tema nung alir, telong nung alir ta kecha mebendang Naga nunger taremshiba ajungai nüchiso asoshi taküm, mapang aser rongsen ajak bendanga aguja meranga aru, saka kodang Naga nunger aika küma  loksa aser balala küma ao, iba nungjagi joko Naga nungeri tetenzükba nükjidong to metongtetsü ta angatetta aruogo. Aji asüyonga tarutsü nung Naga lanurtemi mezüng nükjidong tsüngsü jena meyutsüi bushia aotsü atema merangtsüla saka tanübo joko Naga nungeri teküp-tesü agi matir asünung tang kechi asen jakdang penzür iba nungji kata kata süaka longjemtsüla.
Saka telok ajak aser nübor ajunga sabang ka nung melongjemtetra tanga tesüa Naga nungertembo anisungzük yaktabosa mangutsü ta penzüteter. Aser naga nungertemi lumia Tsüngrem jak mebushi tashi zübazüba India nunger kübok alar tia nungi nüchi tia dangi shilangtsüji temelabo masütsü. Ibri nunger nüchi tia angutsü asoshi Mosa ajanga sayatenya 10 buba nungbo Ijip nunger mezüng asoba jabaso aser mezüng mepoba shiruru ajak tepsettsü iba mapang Ijip lima ajunga mangyim tulu ajurudang Farao chuba temolung temerangba küma mechioktsü ta ser temerem tzüyim tashi Ijip temeranger mirijang jenti kor nung sanger aria aruba bilemtetang. Yamaji Naga nungera Indiai kanga melarabo mechiokli ta bilemer. Ano Yihuda nunger Persia lima tepuokba tia nung alidang Yihuda nunger ajak tepsettsü Persia chubai ozüng renem, iba nungjagi salatsü asoshi Esteri pei nübor ayongzükba lumiba mapa to bilemtetang. Anogo asem anemsü abener kidang mi maputsü chi chiyongtsübo yutsür tzüa majemtsü, shiruru tashi kecha machitsü ayongzük. Aji oda iba telumiba ajanga Yihuda nunger kümzükba bilemtetang. Süra asen Naga nungeri pei kin nüchiso asoshi kwiben nüktsü ayim ? Kwiben lumi ?