NPCC tir Therie-i Rio o Modi na aitsür

Dimapur, January 26 (TYO) :  Nagaland Pradesh Congress Committee (NPCC) nung tir Wb.K.Therie-i anir NPCC lenirtem Nagaland nung tesem balala sema nübortem ajurua senzüdagi aser parnoki taoba hopta nung Tuensang, Tobu  aser Mopong Town-tem tonga oagi lokti senden ayongzüka agiogo.
Iba mapang NPCC tir, K. Therie-i ashiba agi, ” Ni Congress nung alidang ni ‘Bedrock of Naga Society’ ta asüba kaket anema apuso, iba jagi ni Congress nungi aridok.”
Ibayongji 2003 küm onok (NPF) teloki takok angu, iba asoshi nübortem dang pelar. Ajisüaka, election mapang onoki Naga yimten tebilemtsü ya tatembang kati arua latettsü merangtsü ta nangzükba ama mesüi Rioi teyariteper ka dang asütsü sangdongba agi taginüba nükjidong metongteti tang tashi timtema arur ta K.Therie-isa metetdaktsü.
Tangbo joko Nagaland nung Congress purtem meputepba to anenogo aser NPCC aser DCC lenirtem telongjem nung sentong ka adoka lir ta paisa metetdaktsü.
Asen lima nung asenok rongnungbo tamangba yimsü nung kecha mashishitepi pelatepa ka ama alir, saka center nung Narendra Modii aniba sorkar arur dang tamangba yimsü indang ashishitepba metetter ta Therie-isa metetdaktsü.
Asenok den Hindu nungerbo kecha timtem melii litetter saka kechiba BJP teloki asenoki amangba yimsü anema nokdaker. BJP sorkar aruba sülen parnoki Christmas anogo ya “Good Governance Day’ agi melen aser “Good Friday” ya Obendangertem mongdang alitsüba anogo agi melen. Ano, ‘Ghar Wapasi’ ajanga taküm melenshidaktsür aser nashishi ayoktsü aser achitsü memelar ta NPCC tirisa metetdaktsü.
Nagaland nunga NPF aser BJP teloki aniba sokar aija ashidang, Nagaland sorkari nübortem asoshi inyaktsü atema kecha sentong maka. Nübortem tebilemtsü agi meketbanga lir saka lenmang sayur mali, job card alirtem kecha mangudang, job card malirtemang tajangzük angur ta K. Therie-isa metetdaktsü.
NNO asüba mapang nungi 1972 küm Pfutsero nung mongdang alidang, Naga yimten tebilemtsü ya latettsü asoshi telong nung alirtem o India sorkar na tsüngda apu ama küma inyaktsü lemtetba nungi tenzüka inyakba ajanga tanü yimjung nung Naga yimten ken o jembitsüsa jenjang ka ngutetogo ta NPCC tirisa metetdaktsü.
Paisa nübortem dang kodang election arudir, Congress telok yaritsü asoshi mepishia metetdaktsü. Iba sentong nung shilem agia jembirtem rongnung Athang Chongloi Secy., NPCC, Dokiu Kecham Gen. Secy. NPCC,  I. Alemla Chang Secy. NPCC, N. Mosha Chang President DCC Tuensang, V. Lasuh Vice President NPCC aser L. Chuba Yim Secy. NPCC nungertem liasü.

You must be logged in to post a comment Login