Zika Virus anepalutsü mozü bushitsü ajungshir: Obama

Washington, January 27 (Agencies): North aser South America na nung densemba linük 20 dak temai tang ajurushia aliba Zika mesen den sentakba tashidak anepalutsü mozü tekaraba mapang nung bushitsü tajungshiba olen ka US Tir, Barack Obama-i tanü Bodbar nü metetdaktsüogo.

“Zika mesen tendanga iba mesen den sentakba tashidak aneptsütsü mozü tekaraba mapang nung bushitettsü ajunshir,” ta pai ajungshia ashi.

Merilai Zika mesen belenshiba ajanga meimchirtem shirangdaktsüba osang bushiteta lir aser iba tashidak menatepa aoba ajanga America continent nung rongsenren aser terenlok alitsüren na nem tetsükdakba tulu bener arutsütsü akok ta bilema, Obama-i par tongti mozü ketdangsertem den White House nung tanü senden ka ayonga amenba osang jangjaogo.

“Brazil nung kinü tanur 4,000 shi microcephaly ta ajaba tekolak temang den meputep iladaktsüba aser parnok tekolok junga mainba timtem ajurua aliba osang bushiteta lir aser ibaji Zika mesen ajanga bener arutsüba akok,” ta World Health Organization (WHO)-ia metetdaktsüogo.

Ano, mashisa alir tetsürtemi Zika mesen den sentakba tashidak adokba tesemtem mesemdangtsü tekümdangtsü osang ka US Centres for Disease Control & Prevention (CDCP)-ia metetdakja lir.

US kübok Virginia nunga nisung ka dak Zika mesen den sentakba tashidak keta aliba osang yashi, Mongolbar nü putetba osang ka US Health ketdangsertemia tanü metetdaktsüogo.

Tawa South aser Central America semdanger raliwalir ka dak Zika mesen den sentakba tashidak tanü Bodbar nü putetba osang ka Denmark sorkaria metetdaktsüogo.

Zika mesen den sentakba tashidak aneptsütsü mozü tanü tashi bushiteta maliba yong tepok nung aliba tanur temang meshidaki mekümdangtsütsü nükjidong nung El Salvador aser Colombia sorkar natia iba tashidak mesama tashi tetsürtemi tanur tepok nung mebenoktsü tajungshiba olen ka metetdakja lir.

Brazil nunga mitkar züngsem 200,000 shi merila samatsütsü osang prokshia senzüba den külemi, par linük tesem balala nung merila samatsütsü mapatong tenzükba osang jangjaogo.

Merila poktetdak ajemtsüba aser mozü, net aser screen nunger amshia pei temang merila nem memetepdaktsüi kümzüka ayuba ajanga Zika mesen prokshitsüren nokdangtettsü ta WHO-isa metetdaktsüogo.