N Korea’er nuclear ken o: US o China na tebilemba balala lir

China yimtiba, Beijing kübok Foreign Affairs Ministry kilung nung osangbener den aroki ajurutepba jakdang US Secretary of State, John Kerry (Abelen) aser China Foreign Minister, Wang Yi nati teka amtepa ajuruba noksa nung angur. (Beijing, January 27)

Beijing, January 27 (Agencies): United States (US) o China nati Korean peninsula ajunga nung tongpang nung amshitsü nuclear osettsüset yanglua kasaji rizüngtsü maparen nokdangtsü onük pangjema agizükba saka North Korea linük anema tenokdangba sentongtem benokba ken o nungbo par linük anati tangatettep kati maruteti aliba olen ka US Secretary of State, John Kerry-i tanü Bodbar nü metetdaktsüogo.

Kerry-i tanü Beijing yimti semdanga China Foreign Minister, Wang Yi den ajurutepa senden ka amenba sülen iba olenji metetdaktsü.

“US o China nati alima tali tsüka akümba ajanga tsüngsang mupong balaka kümdakja melenshibaren azüoktsü aser iba amala tongti onüktem pangjema agizükogo. Ajisüaka, N Korea’er nuclear mapatong anentsütsü ken o nungbo ozü linük anati tanü tashi tangatettep kati maruteti lir,” ta pai ashi.

“N Korea-i tongpang nung amshitsü nuclear osettsüset yanglua rizüngba ajanga alima talisa, ozü US nem lendong bener arutsütsüa ana nung dang lir,” ta pai shisem.

“United Nations (UN)-i Pyongyang’er nuclear mapatong anema benokba tenokdangba tasen ajunga nungitsü asoshi China-i mulunga lir saka Pyongyang anema tenokdangba sentong tasen benokba ajanga Korean peninsula nung tensa mejungi kümdaktsütsüla,” ta Wang-ia metetdaktsü.

Ajisüaka, par linüki komala tenokdangba sentongtem nungita pusemtsü lemteta ali iba osang tejangjabo pai memetetdaktsü.

Alimai N Korea dang totzü aser mineral osettsüset meyoki nokdanga ayutsü onük US-i benoka lir.

Ajisüaka, Pyongyang dang totzü ayokba aser rongsenren teyari agütsüba linük, China madenbo US-i tan Pyongyang anema tenokdangba tasen benoktsü renemba mapatongji amajok akümtsü.

N Korea-i tan January ita tetenzüklen hydrogen bomb ka tendangba sülen China-i iba maparenji kanga sashia aitsüogo saka par nuclear mapatong anentsütsü asoshi nungdakba tenokdangba sentongtem benoktsü atemabo China-i memulungi lir.

Kerry-i tanü Wang den ajuruba sülen China Tir, Xi Jinping aser par yimsüsürtem dena ajurutepba osang jangjaogo.